කොවිඩ් මර්දන එන්නත ලබාගැනීමට සෞඛ්‍ය සේවයේ ඇතැම් වෘත්තිය සමිති නියැලී ඇති ගෝත්‍රික වෑයම නතර නොකළහොත් සෞඛ්‍ය සේවකයන් අතර ගැටුම් ඇති වී එය වසංගත මර්දනයට නරක ලෙස බලපානු ඇතැයි සමස්ත ලංකා වෛද්‍ය නිලධාරින්ගේ සංගමය සෞඛය ඇමැතිවරියට ලියුමක් යොමු කරමින් අනතුරු අඟවා ඇත.
මෙම තත්ත්වය සැලකිල්ලට ගෙන සෞඛ්‍ය සේවාවේ නියුතු ලක්ෂ එකහමාරකට ආසන්න සියලු සාමාජිකයන්ටත් ඔවුන්ගේ පවුල්වල අයටත් ප්‍රමුඛතාවය ලැබෙන පරිදි එන්නත් කරණය සඳහා ප්‍රමුඛතා ලැයිස්තුවක් සකස් කරන්නැයි සමස්ත ලංකා වෛද්‍ය නිලධාරීන්ගේ සංගමය සෞඛ්‍ය ඇමැතිවරියගෙන් ඉල්ලා ඇත.
ලංකාව තුළ එන්නත් ලබා දීම විවිධ මැදිහත්වීම් සහිත අතිශය දූෂිත වැඩපිළිවෙළක් බවට පත්ව ඇතැයි චෝදනා කරන එම සංගමය දේශපාලකයන් සහ නිලධාරීන් තමන්ට ඇති බලතල යොදා ගනිමින් ඥාති හිතමිතුරන්ට එන්නත් ලබා දීමට මැදිහත් වෙමින් සිටිතැයි ද එම ලිපියෙහි කරුණු සඳහන් කර ඇත.
