ශ්‍රී ලංකාවේ වර්තමාන කොවිඩ් -19 තත්ත්වය පිළිබඳව සාකච්ඡා කිරීම සඳහා එක්සත් ජාතික පක්ෂ නායක පාර්ලිමේන්තු මන්ත්‍රී රනිල් වික්‍රමසිංහ මහතා හා ජනාධිපති ගෝඨාභය රාජපක්ෂ අතර හමුවක් සිදුව තිබෙනවා.
ජනාධිපතිවරයා සහ හිටපු අග්‍රාමාත්‍යවරයා අතර මෙම හමුව අද (17) පෙරවරුවේ ජනාධිපති කාර්යාලයේදී පැවැත්වුණා.
මෙම හමුවේදී රනිල් වික්‍රමසිංහ මහතා ජනාධිපතිවරයාගෙන් ඉල්ලා ඇත්තේ සර්ව පාක්ෂික නායක රැස්වීමක් කැඳවන ලෙසයි.
වෛරසය පැතිරීම පාලනය කිරීම සඳහා දේශපාලන නායකයින්ට යෝජනා ඉදිරිපත් කළ හැකි බව පැහැදිලි කළ ඔහු එක්සත් ජාතික පක්ෂය දැනටමත් තමන්ගේම යෝජනා මාලාවක් ඉදිරිපත් කර ඇති බව ජනාධිපතිවරයාව දැනුවත් කර තිබෙනවා.
සර්ව පාක්ෂික නායක රැස්වීමක් සඳහා වූ ඉල්ලීමට ජනාධිපති ගෝඨාභය රාජපක්ෂ මහතා යහපත් ප්‍රතිචාරයක් දක්වා ඇති බවට තොරතුරු වාර්තා වනවා.
කෙසේ වෙතත්, හිටපු අග්‍රාමාත්‍යවරයා විසින් ඉල්ලා සිටින ලද මෙම සර්ව පාක්ෂික රැස්වීම ජනාධිපතිවරයාගේ පාර්ශවයෙන් කැඳවනවාද යන්න පිළිබඳව මෙතෙක් තහවුරු කිරීමක් ලැබී නැහැ.
(සංරක්ෂිත ඡායාරූපයකි)
