නරේන්ද්‍ර මෝදි , තෙවැනි වරටත් ඉන්දීය අග්‍රාමාත්‍යවරයා ලෙස දිවුරුම් දී තිබෙනවා.
ඉන්දීය ජනාධිපති මන්දිරය හෙවත් රාෂ්ට්‍රපතිභවන් ඉදිරිපිට පැවැති විශේෂ උත්සවයකදී ඉන්දීය ජනාධිපතිනී ද්‍රෞපදී මුර්මු ඉදිරියේ නරේන්ද්‍ර මෝදි මෙලෙස දිවුරුම් දී තිබුණා.
දිවුරුම් දීමේ උත්සවය නවදිල්ලි වේලාවෙන් සවස 7.15 ට ආරම්භ වුණා.
අගමැති මෝදි දිවුරුම් දීමෙන් අනතුරුව ඔහුගේ නව සන්ධාන රජයේ මන්ත්‍රීවරුන් හැත්තෑ දෙදෙනාගේ දිවුරුම් දීම සිදුවිය.
එම හැත්තෑ දෙදෙනාගෙන් 30 දෙනකු කැබිනට් ඇමැතිවරුන් බව සඳහන් වෙනවා.
ඉතා ගාම්භීර අයුරින් පැවැත් වුණු මෙම දිවුරුම් දීමේ උත්සවයට අසල්වැසි කලාපීය රටවල රාජ්‍ය නායකයන්, දේශපාලනඥයන්, රාජ්‍ය තාන්ත්‍රිකයන්, ඉන්දීය නළු නිළියන් ඇතුළු 8,000 ක ආරාධිත අමුත්තෝ පිරිසක් සහභාගී වුණා.
අප්‍රේල් 19 වන දින ආරම්භ වූ ඉන්දීය මහ මැතිවරණය අදියර 7ක් යටතේ ජුනි මස පළමුවන දින දක්වා පැවැත්වුණා. මැතිවරණයේ ප්‍රතිඵල ජුනි 4 වනදා නිකුත් කෙරුණු අතර නරේන්ද්‍ර මෝදිගේ නායකත්වයෙන් යුතු ජාතික ප්‍රජාතන්ත්‍රවාදී සන්ධානය ඉන්දීය පාර්ලිමේන්තුවේ ආසන 293ක් ජයග්‍රහණය කරමින් බහුතර බලය හිමිකර ගත්තා.
කොංග්‍රස් පක්ෂය ප්‍රමුඛ විපක්ෂ සන්ධානයට හිමිකර ගැනීමට හැකිවූයේ ආසන 232ක බලය පමණයි.
