2022 – ලෝක විවාහක රූ රැජින වන ඉන්දීය ජාතික සර්ගම් කවුෂාල් මහත්මිය අද (09) පෙරවරුවේ ශ්‍රී ලංකාවට පැමිණ තිබෙනවා.
ශ්‍රී ලංකා විවාහක රූ රැජින- 2023 තරඟාවලියේ අවසාන මහා තරඟයේ ප්‍රධාන ආරාධිත අමුත්තා ලෙස සහභාගී වීම සඳහා ඇය මෙලෙස පැමිණ ඇති බවයි වාර්තා වෙන්නේ.
ශ්‍රී ලංකා විවාහක රූ රැජින- 2023 තරඟාවලියේ අවසාන මහා තරගය සැප්තැම්බර් 13 වන දින සවස 06 ට කොළඹ නෙළුම් පොකුණ රඟහල් පරිශ්‍රයේ දී පැවැත්වෙන අතර ඒ සදහා ශ්‍රී ලාංකික විවාහක කාන්තාවන් 23 දෙනෙකු සහභාගී වීමට නියමිතයි.
ලෝක විවාහක රූ රැජින අද අලුයම 05.40 ට ඉන්දියාවේ මුම්බායි සිට කටුනායක ගුවන් තොටුපොළ වෙත පැමිණි අතර ඇය පිළිගැනීම සදහා ශ්‍රී ලංකා විවාහක රූ රැජින වැඩ සටහනේ ජාතික අධ්‍යක්ෂ චන්දිමාල් ජයසිංහ ඇතුළු පිරිසක් පැමිණ තිබුණා.
මෙම තරඟාවලියට සහභාගී වීමෙන් අනතුරුව ඇය ශ්‍රී ලංකාවේ සංචාරක ආකර්ෂණය සහිත ස්ථාන නැරඹීමටද අපේක්ෂා කරන අතර එළැඹෙන 15 වෙනිදා සර්ගම් කවුෂාල් මහත්මිය සිය සංචාරය නිමා කර ආපසු ඉන්දියාව බලා පිටත්ව යාමට නියමිතව තිබෙනවා.
