චීනයේ උයිගුර් ජනයාගේ බලහත්කාර ශ්‍රමය උපයෝගී කරගනිමින් “සම්පූර්ණයෙන්ම හෝ අර්ධ වශයෙන්” සාදන ලද ඩොලර් මිලියන 500 කට ආසන්න වටිනාකමකින් යුත් භාණ්ඩ ඇමරිකානු වරායන්ට ඇතුළු කරවීම එක්සත් ජනපද රේගුව විසින් අවහිර කර තිබේ.
චීනයේ ඈත බටහිර ප්‍රදේශය වන ෂින්ජියැන්ග්හි වැඩි වශයෙන් වාසය කරන මුස්ලිම් උයිගුර්වරුන්ගේ ශ්‍රමය බලහත්කාරයෙන් ලබාගනිමි නිෂ්පාදන සහ සැපයුම් දාමයන් ක්‍රියාත්මක කෙරෙන සමාගම්වලට බටහිර ආණ්ඩු විසින් සීමා පැනවීමට සමගාමිව මෙම පියවර ගෙන ඇත.
පසුගිය වසර පුරා බලහත්කාර ශ්‍රමය හේතුවෙන් ඩොලර් මිලියන 816 ක් වටිනා නැව්ගත කිරීම් 3,605 ක් මෙලෙස එක්සත් ජනපදය අවහිර කර තිබේ.
කෙසේවෙතත්, මේ වසරේ අවහිර කරන ලද නැව්ගත කිරීම් වල වටිනාකම දැනටමත් පසුගිය වසරේ අගයෙන් තුනෙන් දෙකකට ළඟා වී ඇති බව රේගු සංඛ්‍යාලේඛන පෙන්වා දෙයි.
මෙම තහනම හේතුවෙන් ඇතැම් ඇමෙරිකානු සමාගම්වලට උයිගර් ස්වයං පාලන කලාපයෙන්, චීනයේ අනෙකුත් ප්‍රදේශවලට සහ වියට්නාමය, මැලේසියාව සහ තායිලන්තය වැනි අනෙකුත් රටවලට සිය මෙහෙයුම් ගෙන යාමට සිදුවී තිබේ.
