ලබන මස සිට සිදු කිරීමට නියමිත විදුලි ගාස්තු සංශෝධනයේ දී විදුලි බිල අඩුවන ආකාරය සම්බන්ධව ලංකා විදුලිබල මණ්ඩලය ඉදිරිපත් කර ඇති යෝජනාව මහජන උපයෝගීතා කොමිසම මඟින් ප්‍රකාශයට පත් කර තිබෙනවා.
එම යෝජනාවට අනුව ඒකක 0 -30 දක්වා කාණ්ඩය පරිභෝජනය කරනු ලබන පාරිභෝගිකයින්ගේ විදුලිබිල සියයට 26.9 අඩු වීමට නියමිතයි.
ඒකක 31 – 60 දක්වා පරිභෝජනය කරන පාරිභෝගිකයින්ගේ විදුලි බිලෙහි අඩුවීම සිදු වන්නේ සියයට 10.8කිනි.
ඒකක 61 -90 දක්වා පරිභෝජනය කරන පාරිභෝගිකයින්ගේ විදුලි බිල සියයට 7.2කින් අඩු කිරීමට යෝජනා වී තිබෙනවා.
මෙම යෝජනාවට අනුව වැඩිම පිරිසක් පරිභෝජනය කරනු ලබන ඒකක 91 – 180 දක්වා කාණ්ඩයේ විදුලිබිල අඩු කිරීම සිදු වනු ලබන්නේ සියයට 3.4කින්.
තවද ඒකක 180ට වැඩි විදුලි පරිභෝජනය කරන විදුලි පාරිභෝගිකයන්ට සියයට 1.3කින් විදුලි බිල අඩු වීමට නියමිතයි.
මේ අතර යෝජිත ගාස්තු සංශෝධනයේ දී ආගමික ස්ථාන සහ පුණ්‍යායතන සඳහා විදුලි බිලෙහි අඩුවීම සියයට 3.2කින් සිදුවන අතර කර්මාන්ත අංශය ,පොදු කාණ්ඩය, වීදි ලාම්පු සහ රාජ්‍ය ආයතන කාණ්ඩයේ විදුලි බිලෙහි කිසිඳු වෙනසක් සිදු නොවන බවයි වාර්තා වන්නේ.
තවද හෝටල් ක්ෂේත්‍රයේ විදුලි බිල සියයට 12.6%කින් අඩු වීමට නියමිතයි.
මේ අනුව ලබන ජූලි මාසයේ සිදුකිරීමට නියමිත විදුලි ගාස්තු සංශෝධන යෝජනාවට අනුව සමස්තයක් ලෙස විදුලි බිල අඩුවන්නේ සියයට 3කිනි.
