මැතිවරණ කොමිසම සියල්ලට පෙර නිශ්චිත මැතිවරණ දින දසුනක් සකස් කරගත යුතු යැයි ද එසේ නොවුණහොත් විවිධ ආණ්ඩු දේශපාලනිකව මැතිවරණ කල්දැමීමේදී දෝෂාරෝපණයට ලක්වීමට කොමිසමට සිදුවනු ඇතැයි මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා ‘නිව්ස් 19’ට අද(1) පැවැසීය.
නිශ්චිත මාර්ගෝපදේශ හා පාලිත කොවිඞ් තත්ත්වයක් යටතේ පළාත් සභා මැතිවරණය පැවැත්විය හැකි වුවත් ආණ්ඩුවට ඊට අවංක කැපවීමක් නැතැයි කී හෙතෙම භික්ෂූන් වහන්සේලා මතවාදීව පළාත් සභාවලට විරුද්ධව මෙහෙයවීමෙන් එය ප්‍රදර්ශනය වන්නේ යැයි ද පැවැසීය.
පළාත් සභා මැතිවරණය ගැන කැබිනට් තීරණයක් නොගෙන ඒ පිළිබඳ තීරණය දේශපාලන පක්ෂ නායකයන්ට යොමුකිරීමෙන් පෙනීයන්නේ එය ආණ්ඩුවේ ජනප්‍රියභාවය පිළිබඳ ප්‍රශ්නයක් යැයි ද එහිදී සිදුවන්නේ එකඟතාවයකින් තොරව තීරණ ගැනීම කල්යෑම යැයි ද ගජනායක මහතා කීය.
පැරැණි මහජන නියෝජිතයන්ම නැවත පළාත් සභාවට පත්කිරීමට දයාසිරි ජයසේකර ඇමැතිවරයා කළ ප්‍රකාශය පය බරවායට පිටිකරට බෙහෙත් බැඳීමක් යැයි ද එය ශ්‍රී ලංකා නිදහස් පක්ෂය පාලක පොදුජන පෙරමුණට මැතිවරණය පැවැත්වීමට බල කළ නොහැකිව කළ හීන පෞරුෂ ප්‍රකාශයක් යැයි ද ගජනායක මහතා සඳහන් කළේය.
පළාත් සභාවලට පැරැණි නියෝජිතයන්ම පත්කිරීමට කිසිදු නීතිමය හෝ සමාජ දේශපාලනික අවශ්‍යතාවයක් නැතැයි ද එසේ නම් ඇමැතිවරුන් බල කළ යුත්තේ පාලක සන්ධානයට මැතිවරණය පැවැත්වීමට යැයි ද ගජනායක මහතා වැඩිදුරටත් සඳහන් කළේය.
