ඔක්සිජන් මත යැපෙන රෝගීන් සංඛ්‍යාවේ සීඝ්‍ර වැඩිවීමක් පසුගිය දින කිහිපය තුළ නිරීක්ෂණය කළ බව ඖෂධ සැපයුම් රාජ්‍ය අමාත්‍ය චන්න ජයසුමන මහතා පවසනවා.
ඒ, ඊයේ (05) දින පාර්ලිමේන්තුව අමතමින්.
මේ වන විට මෙරට නිෂ්පාදනය කරන ඔක්සිජන් ප්‍රමාණය මුළුමනින්ම පාහේ රෝගීන්ගේ අවශ්‍යතාවට යොදාගන්නා තත්වයට පත්ව ඇති බවයි ඔහු පෙන්වා දෙන්නේ.
කෙසේ නමුත් අවශ්‍යවන ඔක්සිජන් ප්‍රමාණය ඉදිරි සති දෙකක කාලය තුළ ඉන්දියාවෙන් සහ සිංගප්පූරුවෙන් ආනයනය කිරීමට කටයුතු සූදානම් කර ඇති බවත් ඔහු පවසනවා.
“රටේ කොවිඩ් – 19 පිළිබඳව තියෙන තත්වය එතරම් සතුටුදායක නෑ. විශේෂයෙන්ම ඔක්සිජන් මත යැපෙන රෝගීන් සංඛ්‍යාවේ සීඝ්‍ර වැඩිවීමක් පහුගිය දින කිහිපය තුළ අපි නිරීක්ෂණය කරනවා. විශේෂයෙන්ම අද වෙනකොට ලංකාවේ නිපදනව ඔක්සිජන් ප්‍රමාණය මුළුමනින්ම පාහේ රෝගීන්ගේ අවශ්‍යතාවට යොදාගන්නා තත්වයට පත්වෙලා තියෙනවා. මේක නිසා අප ඉදිරි සති දෙකක කාලයේදී ඉන්දියාවෙන් සහ සිංගප්පූරුවෙන් ඔක්සිජන් ගෙන ඒම සඳහා මේ වෙනකොට අවශ්‍ය කටයුතු සූදානම් කරලා තියෙනවා”
