පළාත් පාලන ආයතන අධීක්ෂණය වෙනුවෙන් ප්‍රාදේශීය සංවර්ධන කමිටුවේ සභාපතිවරයාගේ නියෝජිතයෙකු පත් කිරීමේ තීරණයට විරෝධය පළ කරන බව මැතිවරණ කොමිෂන් සභාව පවසනවා.
එම කොමිෂන් සභාවේ සභාපති නීතිඥ නිමල් ජී පුංචිහේවා මහතා කියා සිටියේ මේ සම්බන්ධව හෙට දිනයේ දී පළාත් පාලන අමාත්‍යාංශයට ලිඛිතව දැනුම් දීමක් සිදු කරන බවයි.
පසුගියදා පළාත් පාලන අමාත්‍යංශය විසින් පළාත් පාලන ආයතන අධීක්ෂණය සඳහා ප්‍රාදේශීය සංවර්ධන කමිටුවේ සභාපතිවරයාගේ විශේෂ නියෝජිතයෙකු පත්කිරීම සම්බන්ධව චක්‍රලේඛයක් නිකුත් කර තිබුණා.
මැතිවරණ කොමිසම පෙන්වා දෙන්නේ අදාළ තීරණයෙන් පළාත් පාලන ආයතනවල කටයුතු යම් දේශපාලනීකරණයට ලක් වන බවයි.
තවද සෙසු දේශපාලන පක්ෂවලින් ඉදිරිපත් වන අපේක්ෂකයින්ට අසාධාරණයක් වන බවට විවිධ පාර්ශ්ව වෙතින් පැමිණිලි ලැබී ඇති බවද එම සභාව සඳහන් කරනවා.
පළාත් පාලන අධීක්ෂණය සඳහා නියෝජිතයෙකු පත්කිරීමේ තීරණයට මැතිවරණ කොමිසම විරෝධය පළකරන අතර පළාත් පාලන ආයතන සම්බන්ධීකරණය සහ අවශ්‍ය තොරතුරු අදාළ පළාත් පාලන ආයතනයේ නාගරික කොමසාරිවයාගෙන් හෝ ලේකම්වරයාගෙන් ලබා හැකි බවයි නීතිඥ නිමිල් ජී පුංචිහේවා මහතා වැඩිදුරටත් කියා සිටියේ.
