නඩු දෙකක් සඳහා හිටපු ආර්ථික සංවර්ධන ඇමති බැසිල් රාජපක්ෂ මහතා වෙත විදේශ ගමන් වළක්වාලමින් පනවා තිබූ තහනම් නියෝග දෙකක් ඉවත් කරන ලෙස කොළඹ මහාධිකරණය අද (30) නියෝග කර ඇත.
මෝසමක් ඉදිරිපත් කරමින් විත්තිකාර බැසිල් රාජපක්ෂ මහතා වෙනුවෙන් පෙනී සිටි නීතිඥවරු කරන ලද ඉල්ලීම් සලකා බැලීමෙන් අනතුරුව මෙම තහනම් නියෝග ඉවත් කර ඇත.
මේ අතර 2015 වසරේ පැවති ජනාධිපතිවරණය සමයේ දිවිනැගුම සංවර්ධන අරමුදලින් රුපියල් මිලියන 38 ක මුදලක් වැය කර දිවයින පුරා පිහිටි ප්‍රාදේශීය සභා වෙත ජී.අයි.පයිප්ප බට මිලදීගෙන බෙදාහැරීම තුළින් රජයේ මුදල් සාවද්‍ය ලෙස පරිහරණය කළ බවට චෝදනා කරමින් බැසිල් රාජපක්ෂ මහතාට එරෙහිව තවත් නඩුවක් ගොනු කර තිබු අතර එම නඩුව සඳහා ද ඒ මහතා වෙත විදෙස් ගමන් තහනමක් පනවා තිබුණි.
එම නඩුව ද අද මෝසමක් මාර්ගයෙන් කැඳවනු ලැබූ අවස්ථාවේදී කොළඹ මහාධිකරණ විනිසුරු ධම්මික ගනේපොල මහතා විසින් විත්තිකාර රාජපක්ෂ මහතා වෙත පනවා තිබු විදෙස් ගමන් තහනම් කිරීමේ නියෝගය ඉවත් කරන ලෙස ආගමන හා විගමන පාලකවරයාට නියෝග කර ඇත.
2015 වසරේ පැවැත්වූ ජනාධිපතිවරණය සමයේ දිවිනැගුම සංවර්ධන දෙපාර්තමේන්තුවට අයත් අරමුදල්වලින් රුපියල් මිලියන 2992 කට අධික මුදලක් වැය කර දිවිනැගුම සහනාධාරලාභීන්ට නිවාස ආධාර ලබා දීම තුළින් රජයේ අරමුදල් සාවද්‍ය ලෙස පරිහරණය කළේ යැයි ඔවුන්ට චෝදනා එල්ල වී තිබුණු අතර එම නඩුවෙන් හිටපු ආර්ථික සංවර්ධන ඇමැති බැසිල් රාජපක්ෂ මහතා ඇතුළු විත්තිකරුවන් හතර දෙනෙකු නිදොස් කොට නිදහස් කරන ලෙස කොළඹ මහාධිකරණය අද (30) නියෝග කර තිබුණි.
