කොවිඩ්-19 රෝගීන් සම්බන්ධයෙන් ශ්‍රී ලංකාව මේ වන විට දකුණු ආසියානු රටවල් අතර තුන්වන ස්ථානයට පත්ව ඇති අතර ඔක්සිජන් මත යැපෙන කොවිඩ්-19 සංඛ්‍යාව 441% ක වාර්තා ගත ප්‍රතිශතයකින් ඉහළ ගොස් ඇතැයි රජයේ වෛද්‍ය නිලධාරීන්ගේ සංගමයේ විධායක කමිටු සාමාජික වෛද්‍ය ප්‍රසාද් කොළඹගේ මහතා පවසයි.
පැතිර යන නව කොවිඩ්-19 ප්‍රභේදයේ අන්තරායදායක බව තහවුරු කරමින් දෛනික මරණ සංඛ්‍යාව 50 කට ආසන්න සංඛ්‍යාවක් දක්වා ඉහළ ගොස් ඇති බව ද ඔහු පෙන්වා දෙන්නේය.
මෙහි භයානකම තත්ත්වය වන්නේ අප්‍රේල් මැයි මාස දෙකක කාල සීමාවේදී ඔක්සිජන් මත යැපීමේ අනුපාතය 441% දක්වා ඉහළ ගොස් තිබීම බව එම සංගමය පවසයි.
වෛරසය පැතිරීම පාලනය කිරීම සඳහා ගමන් සීමාවන් පනවා තිබුණද, රෝගයේ බරපතලකම අඩු වී නොමැති බව එමඟින් තහවුරු වන්නේ යැයි වෛද්‍ය කොළඹගේ මහතා ප්‍රකාශ කරන ලදී.
කොවිඩ්-19 ආසාධන සහ සංකුලතා දැඩි ලෙස ඉහළ යමින් පවතින බැවින් සංචරණ සීමා ඉවත් කළ ද නිදහස අනිසි ලෙස භාවිත නොකරන ලෙස ද එසේ නොවුණහොත් විශාල ව්‍යසනයක් ඇති වීම වැළක්විය නොහැකි බව ද ඒ මහතා පෙන්වා දුන්නේය.
