ආණ්ඩුවට වැරැදි පෙන්වා දුන් විට ඒවා නිවැරැදි කරනොගන්නේ නම් එය දේශපාලන නායකයන්ගේ වරදක් යැයි රුවන්වැලි සෑ චෛත්‍ය රාමාධිපති පල්ලේගම හේමරතන හිමියෝ ශ්‍රී ලංකා පොදුජන පෙරමුණේ හිටපු පළාත් සභා මන්ත්‍රීවරුන්ට අවවාද කර ඇත.
හේමරතන හිමියන් මෙසේ චෝදනාත්මකව ප්‍රකාශයක් කර ඇත්තේ ආණ්ඩුව පිහිටුවීම සඳහා සහාය දුන් භික්ෂූන් වහන්සේලා පවා ආණ්ඩුව විවේචනය කරමින් සිටින බවට ශ්‍රී ලංකා පොදුජන පෙරමුණේ මන්ත්‍රීවරුන් පිරිසක් උන්වහන්සේ හමුවේ කනස්සල්ල පළ කළ අවස්ථාවේය.
ඕනෑම අයකුට කතා කිරීමේ නිදහස ඇතැයි ද වරදක් පෙන්වා දුන් විට එය නිවැරැදි කරගැනීම නායකයන්ගේ වගකීමක් යැයි ද පෙන්වා දී ඇති රුවන්වැලි සෑ චෛත්‍ය රාමාධිපති පල්ලේගම හේමරතන හිමියෝ එය එසේ නොවන්නේ නම් විවේචනවලට පදනම් වන කරුණු ඇත්ත යැයි පිළිගැනීමට තමන්වහන්සේට ද සිදුවනු ඇතැයි අවධාරණය කර ඇත.
පළාත් සභාවල අවශ්‍යතාව අවධාරණය කිරීම සඳහා භික්ෂූන් වහන්සේලා හමුවී කරුණු දැක්වීමට ගිය අවස්ථාවේ මෙම අවවාද කිරීම් සිදුව ඇත.
