සෝල් බීච් හෝටලයේ හිමිකරුවන් විසින් ගොනුකර තිබෙන මූලික අයිතිවාසිකම් පෙත්සම සලකාබැලීම සඳහා ජුලි මස 10 වනදා කැඳවන ලෙස ශ්‍රේෂ්ඨාධිකරණය අද (03) නියම කළා.
යුක්තිය මෙහෙයුම යටතේ ඉකුත්දා දෙහිවල මුහුදුබඩ ප්‍රදේශයේ පිහිටි “සෝල් බීච්” හෝටලය කඩා ඉවත් කිරීමේ සිද්ධිය තුළින් සිය මූලික මිනිස් අයිතිවාසිකම් උල්ලංඝනය වී ඇති බවට නියෝගයක් ලබාදෙන ලෙස ඉල්ලා එම පෙත්සම ගොනුකර තිබෙනවා.
මෙම පෙත්සම අද ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් ඉදිරියේ කැඳවනු ලැබුවා.
එම අවස්ථාවේදී අදාළ පෙත්සමේ වගඋත්තරකරුවන්ට නොතීසි ලබාදීමට පියවර ගන්නා ලෙස පෙත්සම්කාර පාර්ශ්වයට විනිසුරු මඩුල්ල විසින් නියෝග කර තිබුණා.
ඉන් අනතුරුව දෙපාර්ශ්වයේ නීතිඥවරු විසින් කරන ලද ඉල්ලීම පිළිගත් විනිසුරු මඩුල්ල අදාළ පෙත්සම සලකාබැලීම සඳහා ජුලි මස 10 වනදා කැඳවන ලෙස නියෝග කෙරුණා.
වෙරළ සංරක්ෂණ දෙපාර්තමේන්තුවේ නිසි අනුමැතිය ලබාගෙන නිත්‍යානුකූලව පවත්වා ගෙන ගිය අදාළ ගොඩනැගිල්ලක් කිසිදු සාධාරණ හේතුවක් නොමැතිව කඩා ඉවත් කිරීම තුළින් පොලිස්පති දේශබන්දු තෙන්නකෝන් ඇතුළු නිලධාරීන් සිය මූලික මිනිස් අයිතිවාසිකම් උල්ලංඝනය කර ඇති බවට තීන්දුවක් ලබාදෙන ලෙස ඉල්ලා එහි හිමිකරුවන් විසින් මෙම පෙත්සම ඉදිරිපත් කර තිබෙනවා.
