සෑම වසරකම අප්‍රේල් මස නුවරඑළියේ මහනගර සභාව මගින් සංවිධානය කරනු ලබන වසන්ත සැණකෙළිය වෙනුවෙන් තාවකාලික කඩ කාමර ඉදිකිරීම සඳහා නාගරික සංවර්ධන අධිකාරිය සතු බිම් කොටස් මාසික බදු පදනම මත පසුගිය වසරේ අගෝස්තු මාසය වන විට අලෙවි කර අවසන් බව නාගරික සංවර්ධන අධිකාරියේ නුවරඑළිය දිස්ත්‍රික් සහකාර අධ්‍යක්ෂක චමින්ද සමන් කුමාර මහතා පවසනවා.
ඔහු මේ බව පැවසුවේ, නුවරඑළිය මහනගර සභාවේ වසන්ත සැණකෙළිය වෙනුවෙන් පසුගියදා පැවැති සැලසුම් රැස්වීමේදීයි.
කිසිදු විනිවිද භාවයකින් හා ක්‍රියා පටිපාටියකින් තොරව හිතවතුන් කිහිපදෙනෙකු අතර නාගරික සංවර්ධන අධිකාරියට අයත් බිම් කොටස් වසන්ත සැණකෙළිය වෙනුවෙන් මේ වන විටත් හොර රහසේ අලෙවිවී ඇති බවට රැස්වීමට පැමිණි නුවරඑළිය මහ ජනතාව සහකාර අධ්‍යක්ෂකවරයාට චෝදනා කර තිබෙනවා.
එහිදි වැඩිදුරටත් අදහස් දැක්වූ ඔහු,
“පත්තර දැන්වීම්, රූපවාහිනී දැන්වීම් හා ප්‍රසිද්ධ දැන්වීම් කිසිවක් අපි දැම්මේ නෑ. අපිට පසුගිය 2023 වසරේ අගෝස්තු මාසයේ ඉඳන්ම ඉල්ලුම් පත්‍ර ලැබුණා වසන්ත සැණකෙළියේ තාවකාලික කඩ කාමර ඉදිකිරීම සඳහා බිම් කොටස් ලබා ගන්න. ඒ ආපු ඉල්ලීම් වලට අනුව අපි බිම කොටස් ටික ලබාදීලා ඉවරයි. මේ වෙන විටත් සියලු බිම් කොටස් අපි ලබා දීලා අවසන්”
එහිදී සහකාර අධ්‍යක්ෂකවරයාගේ එම ප්‍රකාශයත් සමග රැස්වීම උණුසුම් තත්ත්වයක් හට ගැනුණා.
එමෙන්ම මහජනතාවගේ බදු මුදල්වලින් එකතු වන මුදලින් අතිවිශාල තොගයක් වියදම් කරමින් සංවිධානය කරනු ලබන නුවරඑළිය වසන්ත සැණකෙළියේ සියලු ආදායම් නුවරඑළිය මහ නගර සභාවට ලැබිය යුතු අතර එහි සියලු ප්‍රතිලාභ නුවරඑළියේ මහජනතාවට ලැබිය යුතු බවට නුවරඑළිය සිවිල් සංවිධාන නියෝජිතයන්, වෙළඳ ව්‍යාපාරිකයන් හා නුවරඑළිය ජනතාව නුවරඑළිය මහ නගර සභාවට යෝජනා කළා.
එහිදී සිවිල් සමාජ ක්‍රියාකාරීන්, වෙළෙඳ ව්‍යාපාරිකයන් සහ මහජනතාව වැඩිදුරටත් දැක්වූ අදහස්,
“මෙලෙස මහනගර සභාව මගින් සංවිධානය කරනු ලබන වසන්ත සැණකෙළියේ භූමි කොටස් කිසිම ක්‍රමවේදයක් නොමැතිව විනිවිද භාවයකින් තොරව රජයට ගෙවිය යුතු සොච්චම් මුදලක් ලබා ගනිමින් කිහිපදෙනෙකු අතර හොර රහසේ බෙදා දීමට නාගරික සංවර්ධන අධිකාරියේ කටයුතු කිරීමෙන් එම බිම් කොටස් ලබා ගන්නා කිහිප දෙනා පමණක් ඔවුන්ට හිතුමතේ එහි වටිනාකම් තීරණය කරනවා. එයින් ලක්ෂයක් ලක්ෂ එකහමාරක් අතර විශාල මුදලකට කුඩා කැබැලි වලට එම බිම් කොටස් වෙන්කර වෙළෙඳ කුටි සඳහා අලෙවි කරනවා.”
“එය එසේ නොකර නුවරඑළිය මහ නගර සභාවට සම්පූර්ණ භූමි ප්‍රමාණය පවරාගෙන නුවරඑළිය මහ නගර සභාවෙන් එම භූමි කොටස් ව්‍යාපාරිකයන්ට බෙදා දුන්නේ නම් ඔවුන්ට එම භූමි කොටස් ලබා ගැනීම සඳහා වැය වන්නේ රුපියල් 20000 ක් 24000ක් වැනි ඉතා අඩු මුදලක්.”
එමෙන්ම දැනට නාගරික සංවර්ධන අධිකාරිය හොර රහසේ ලබාදී ඇති බිම් කොටස්වල මුදල් අදාළ පාර්ශවයන් වෙත පියවා නාගරික සංවර්ධන අධිකාරිය සතුව ඇති එම ඉඩම් කොටස් මහනගර සභාව වෙත පවරාගෙන ඉන් අනතුරුව නුවරඑළි ජනතාවට මුල් තැන ලබාදී සහනදායි මිලකට අදාළ බිම් කොටස් බෙදා දෙන ලෙස ඔවුන් යෝජනා කර තිබෙනවා.
තවද එම යෝජනාවට නාගරික සංවර්ධන අධිකාරිය අකමැත්ත ප්‍රකාශ කරන කල මහ නගර සභාව මගින් ලබා දෙනු ලබන ජල පහසුකම්, විදුලිය ලබා ගැනීම සඳහා වන අවසර ලිපි සහ කසල කළමනාකාරීත්වයට ලබාදෙන දායකත්වය යනාදිය ලබා නොදීමට කටයුතු කරන ලෙසත් නුවරඑළිය මහ නගර සභාවට වරිපනම් හා බදු මුදල් ගෙවන මහජනතාව හා වෙළෙඳ ව්‍යාපාරිකයන් තරයේ ඉල්ලා සිටියා.
කෙසේවෙතත්, නාගරික සංවර්ධන අධිකාරියේ නිලධාරීන් සමග කඩිනමින් සාකච්ඡාවක් ලබාගෙන මෙම ගැටලුව සඳහා සාර්ථක විසඳුමක් ලබා ගැනීමට හැකි විගසින් උත්සාහ දරන බව නුවරඑළිය මහ නගර සභාවේ වැඩබලන නාගරික කොමසාරිස් හා අතිරේක දිස්ත්‍රික් ලේකම් සුජීවා බෝධිමාන්න මහත්මිය වැඩිදුරටත් පැවසුවා.
