නාරහේන්පිට,ඇල්විටිගල මාවතේ පිහිටි වෘත්තීය පුහුණු අධිකාරියේ කලමනාකාර සහකාර නිලධාරියකුට අමානුෂික ලෙස පහර දී ඝාතනය කළ බවට සැකපිට පොලිස් මත්ද්රව්ය නාශක කාර්යාංශයේ උප පොලිස් පරීක්ෂකවරයෙක් ඇතුළු පොලිසියේ හත් දෙනෙක් රහස් පොලීසියේ මිනීමැරුම් විමර්ශන අංශයේ පොලිස් කණ්ඩායමක් විසින් අත්අඩංගුවට ගෙන තිබෙනවා.
මෙසේ ඝාතනය ලක් වූයේ හික්කඩුව තෙල්වත්ත ප්රදේශයේ පදිංචිව සිටි අන්තෝනි ගමගේ සමන්ත ප්රීති කුමාර නැමැති 41 හැවිරිදි විවාහක අයෙක්.
ප්රීති කුමාර මහතා පොලිස් මත්ද්රව්ය නාශක කාර්යාංශයේ පොලිස් කණ්ඩායමක් විසින් ජනවාරි මස 10 වැනිදා රාත්රී කාලයේ කොළඹ නෙළුම් කුළුණ ආසන්නයේදී අත්අඩංගුවට ගෙන තිබුණා.
මොහු රහස් පොලිසිය කළ විමර්ශනවලදී අනාවරණය වී තිබෙන්නේ මත්ද්රව්ය ජාවාරම්කරුවකු යැයි පවසමින් ප්රීති කුමාර මහතාහට අමානුෂික ලෙස පහර දී ඇති බවයි.
පහරකෑමෙන් අසාධ්ය තත්ත්වයට පත් වූ ප්රීති කුමාර මහතා කොළඹ ජාතික රෝහලට ඇතුළත් කර ප්රතිකාර ලබමින් සිටියදී එදිනම මියගොස් තිබුණා.
මොහු මත්ද්රව්ය ජාවාරම්වලට කිසිදු සම්බන්ධතාවයක් නොමැති අයකු බව රහස් පොලිසිය කරන ලද පරීක්ෂණවලදී පසුව තහවුරු වී තිබෙන අතර අත්අඩංගුවට ගන්නා ලද පොලිස් නිලධාරීන් හත්දෙනාගෙන් දීර්ඝ වශයෙන් සිද්ධියට අදාළව ප්රශ්න කර ප්රකාශ ලබා ගැනීමෙන් පසු හෙළි වූ තොරතුරු පදනම් කරගෙන ඔවුන් සැකපිට අත්අඩංගුවට ගත් බව රහස් පොලීසිය පවසනවා.