කොතලාවල විශ්ව විද්‍යාල පනතට එරෙහි විරෝධතාවන් සිදුවන්නේ අවබෝධයකින් තොරව බව ජනාධිපති ගෝඨාභය රාජපක්ෂ මහතා පවසනවා.
ඒ මහතා මේ බව ප්‍රකාශ කර සිටියේ පුරවර විශ්වවිද්‍යාල වැඩසටහන සංකල්පයක් ලෙස හඳුන්වා දෙමින් නිල වෙබ් අඩවිය (www.cu.ac.lk) විවෘත කිරීමට ඊයේ දින සහභාගී වෙමින්.
මෙරට ශිෂ්‍ය සංවිධාන විසින් සිදු කළ යුත්තේ අධ්‍යාපන ප්‍රතිසංස්කරණ පිළිබඳව සාකච්ඡා කිරීම බවත් දේශපාලන අභිමතාර්ථ වෙනුවෙන් පෙනී සිටීම නොවන බවත් මෙහිදී ඒ මහතා ප්‍රකාශ කර සිටියා.
එමෙන්ම, 100% රජයේ විශ්වවිද්‍යාල පවත්වාගෙන යාමට හැකියාවක් නොමැති නමුත් හුදෙක් ව්‍යාපාරික අරමුණින් පමණක් පෞද්ගලික විශ්වවිද්‍යාල පවත්වාගෙන යාමට තමා ද විරුද්ධ බවත් ජනපතිවරයා පවසනවා.
රජයක කාර්‍ය වන්නේ රැකියා ලබාදීම නොව රැකියා උත්පාදනය වන වටපිටාවක් බිහිකිරීම බවත් පුරවර විශ්වවිද්‍යාල වැඩසටහනෙන් අපේක්ෂා කරනුයේ, ආර්ථිකයට සෘජුව සම්බන්ධ විය හැකි හෝ ස්වයං රැකියාවක නිරත විය හැකි දැනුමක් සහිත පුද්ගලයෙකු උපාධිය අවසානයේ නිර්මාණය කිරීම බවත් ජනපතිවරයා පෙන්වා දෙනවා.
පුරවර විශ්වවිද්‍යාල වැඩසටහන යටතේ පළමු සරසවිය කෑගල්ල දිස්ත්‍රික්කයේ, පින්නවල ප්‍රදේශය කේන්ද්‍ර කරගනිමින් ඉදිරි සති කිහිපය තුළදී ආරම්භ කිරීමට සැලසුම් කර තිබේ.
ජනාධිපති ලේකම් පී.බී. ජයසුන්දර, අමාත්‍යාංශ ලේකම්වරු, විශ්වවිද්‍යාල ප්‍රතිපාදන කොමිෂන් සභාවේ සභාපති ඇතුළු නිලධාරීන් ද වෙබ් අඩවිය විවෘත කිරීමේ අවස්ථාවට එක්ව සිටියහ.
