සෞඛ්ය විෂය මධ්යම රජයෙන් ක්රියාත්මක සංවෘත සේවාවක් ලෙස නව ආණ්ඩුක්රම ව්යවස්ථා කෙටුම්පතට ඇතුළත් කරන ලෙස අග්රාමාත්ය මහින්ද රාජපක්ෂ මහතා උපදෙස් ලබාදී තිබේ.
රජයේ වෛද්ය නිලධාරීන්ගේ සංගමය සමඟ අරලියගහ මන්දිරයේ පැවති සාකච්ඡාවක් අතරතුර එම සංගමයේ සභාපති විශේෂඥ වෛද්ය අනුරුද්ධ පාදෙණිය මහතා සිදුකළ ඉල්ලීමකට අග්රාමාත්යවරයා මෙලෙස එකඟතාව පළ කර ඇති බව සඳහන් වේ.
සෞඛ්ය සේවය සහ වෛද්යවරුන් හමුවේ පවතින ගැටලු හා එම ගැටලු විසඳා ගැනීමට රජයේ වෛද්ය නිලධාරීන්ගේ සංගමය ඉදිරිපත් කරන යෝජනා මෙහිදී සාකච්ඡාවට ගෙන තිබේ.
රජයේ වෛද්ය පීඨයකින් බිහිවන වෛද්යවරුන්ගේ වයස් සීමාව මේ වන විට අවුරුදු 28 හෝ 30 ට ආසන්න වන බව සභාපතිවරයා පෙන්වාදුන් අතර එහිදී අග්රාමාත්යවරයා සඳහන් කළේ, එම වයස් සීමාව අවුරුදු 22 හෝ 23 දක්වා අඩු කර ගැනීමට අධ්යාපන අමාත්යාංශය සමඟ ඒකාබද්ධ වැඩපිළිවෙලක් සකස් කරන ලෙසය.
මෙහිදී අධ්යාපන අමාත්යාංශ ලේකම් මහාචාර්ය කපිල පෙරේරා මහතා සඳහන් කළේ, සාමාන්ය පෙළ විභාගය අගෝස්තු මාසයේදීත්, උසස් පෙළ විභාගය දෙසැම්බර් මාසයේදීත් පවත්වන නව යෝජනාවක් අමාත්ය මණ්ඩල අනුමැතියට ලබන සතියේ යොමු කරන බවය.
ඒ අනුව දරුවන්ගේ අධ්යාපනයට වැඩිපුර ගත වූ මාස 9ක කාලය අඩු කර ගැනීමට අපේක්ෂා කරන බව ද ලේකම්වරයා සඳහන් කළේය.
වෛද්ය සභාව සම්බන්ධයෙන් පැන නැගී ඇති ගැටලු පිළිබඳව විමසා බැලූ අග්රාමාත්යවරයා වෛද්ය සභාව ස්වාධීනව පවත්වාගෙන යාමට කටයුතු කරන ලෙස සෞඛ්ය අමාත්යවරියට උපදෙස් ලබා දී තිබේ.
එමෙන්ම විශේෂඥ වෛද්යවරුන්ට අමතරව සියලුම වෛද්යවරුන්ගේ විශ්රාම වයස අවුරුදු 62 හෝ 63 දක්වා දීර්ඝ කිරීම පිළිබඳව ද මෙහිදී අග්රාමාත්යවරයාගේ අවධානය යොමු වූ බව අග්රාමාත්ය මාධ්ය ඒකකය සඳහන් කළේය.