අ.පො.ස (සාමාන්‍ය පෙළ) විභාගය සමත්/අසමත් බව නොසලකා උසස් පෙළ වෘත්තීය විෂය ධාරාව හැදෑරීම සඳහා සිසුන්ට අවස්ථාව සලසා දී ඇති අතර, මේ වන විට සෑම අධ්‍යාපන කොට්ඨාසයක්ම ආවරණය වන පරිදි පාසල් 604ක එම විෂය ධාරාව ක්‍රියාත්මක වෙනවා.
එම විෂය ධාරාව යටතේ 12 වන ශ්‍රේණියේදී මෘදු කුසලතා සංවර්ධනය කරන පොදු විෂයයන් හැදෑරිය යුතු අතර, 13 වන ශ්‍රේණියේදී ජාතික වෘත්තීය සුදුසුකම් 4 මට්ටමේ (NVQ 4) පාඨමාලාවක් මාස 06ක කාලයක් හැදෑරීමට සහ මාස 06ක රැකියාගත පුහුණුවක යෙදීමට සිසුන්ට අවස්ථාව සැලසෙනවා.
එමෙන්ම, එම සිසුන් සඳහා NVQ 4 මට්ටමේ පාඨමාලා පවත්වාගෙන යාම් සඳහා අමාත්‍යාංශ 07ක් යටතේ ක්‍රියාත්මක වන වෘත්තීය පුහුණු ආයතන 17ක් මේ වන විට අධ්‍යාපන අමාත්‍යාංශය සමඟ අවබෝධතා ගිවිසුම්වලට එළඹ තිබෙනවා.
දැනට වෘත්තීය විෂය ධාරාව හැදෑරීම් සඳහා සිසුන් 50,000ක් පමණ ලියාපදිංචි වී ඇති බැවින් අදාළ වෘත්තීය පුහුණුව ලබා දීම සඳහා රජයේ අනුග්‍රහය මත ක්‍රියාත්මක වන සියලුම වෘත්තීය පුහුණු ආයතන විසින් එකී සිසුන් සඳහා ප්‍රමුඛතාව ලබා දීමේ අවශ්‍යතාව හඳුනා ගෙන ඇති බවද රජය පවසනවා.
ඒ අනුව, සියලුම අමාත්‍යාංශ යටතේ ක්‍රියාත්මක වන වෘත්තීය පුහුණු ආයතන විසින් උසස් පෙළ වෘත්තිය විෂය ධාරාව හදාරනු ලබන සිසුන්ට වෘත්තීය පුහුණුව ලබා දීම අනිවාර්ය කාර්යයක් බවට පත් කිරීමටත් , එම ආයතනවල MUP 4 පාඨමාලාවලට වාර්ෂිකව සිසුන් ඇතුළත් කර ගැනීමේදී වෘත්තීය විෂය ධාරාවේ සිසුන්ට ප්‍රමුඛත්වය ලබා දී පුහුණුවට අවශ්‍ය පහසුකම් සැලසීමටත් අධ්‍යාපන අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර තිබෙනවා.
