බ්‍රිතාන්‍යයේ – ග්‍රීන්පීස් නම් පරිසර ආරක්ෂණ ක්‍රියාකාරීන් පිරිසක් බ්‍රිතාන්‍ය අගමැති රිෂි සුනක්ගේ නිවස කළු රෙද්දකින් වසා විරෝධතාවයක නිරත වී තිබෙනවා.
බ්‍රිතාන්‍ය අගමැති රිෂි සුනක් උතුරු මුහුදේ නව තෙල් සහ ගෑස් බලපත්‍ර සිය ගණනක් අනුමත කිරීම නිසා මේ සම්බන්ධයෙන් පරිසරවේදීන් දිගින් දිගටම සිය අප්‍රසාදය පළ කළ බව විදෙස් මාධ්‍ය වාර්තා කරනවා.
ලැව්ගිනි සහ ගංවතුර හේතුවෙන් ලොව පුරා නිවාස සහ ජීවිත විනාශ වන විට, අගමැති රිෂි සුනක් තෙල් හා ගෑස් කැණීම් විශාල වශයෙන් ව්‍යාප්ත කරන බවයි ග්‍රීන්පීස් වෙබ් අඩවිය පවසන්නේ.
කෙසේ වෙතත් උතුරු බ්‍රිතාන්‍යයේ රිෂි සුනක්ගේ නිවසේ වහලය මතට ක්‍රියාකාරීන් හතර දෙනෙකු නැග කළු රෙදිවලින් ආවරණය කරන වීඩියෝ පට මේ වනවිට නිකුත් වෙමින් තිබෙන බව විදෙස් මාධ්‍ය වාර්තා පෙන්වා දෙනවා.
නමුත් අග්‍රාමාත්‍යවරයා සහ ඔහුගේ පවුලේ අය මේ වන විට කැලිෆෝනියාවේ නිවාඩුවක් ගත කරමින් සිටීමද විශේෂත්වයක්.
