බිල්කිස් බානෝ නම් මුස්ලිම් කාන්තාවක් සමූහ දූෂණයකට ලක් කිරීමේ චෝදනාවට ජීවිතාන්තය දක්වා සිරගත කර සිටි පුද්ගලයින් 11 දෙනෙකු නිදහස් කිරීමට ඉන්දීය රජය ගත් තීරණයට එරෙහිව ඉන්දියාව පුරා විරෝධතා පැවැත්වෙනවා.
මෙම පුද්ගලයින් වසර 15ක සිරදඬුවම් කාලයක් ගතකිරීමෙන් අනතුරුව පසුගිය ඉන්දීය නිදහස් දිනයේදී නිදහස් කිරීමට ඉන්දීය රජය තීරණය කළා.
මෙම තීරණයට විරෝධය පලකරමින් ස්ත්රී දූෂකයන් නිදහස් කිරීමට ගත් තීරණය ආපසු හරවන ලෙස රජයට බලකර දැවැන්ත විරෝධතා මේ වන විට ක්‍රියාත්මක වනවා.
ඉන්දීය සිනමා තරුවක් සහ කාන්තා අයිතිවාසිකම් වෙනුවෙන් පෙනී සිටින ෂබානා අස්මි දිල්ලි අගනුවර පැවති විරෝධතාවයක් අතරතුරදී AFP පුවත්සේවයට පැවසුවේ “බිල්කිස් බානෝට සිදු වූ දේ, ඇගේ පවුලට සිදු වූ දේ, අපේ රටට සිදුවන දේ අපට බලා සිටිය නොහැක. ඒ නිසා අපි සියල්ලෝම එන්නෙමු. එක්ව අපගේ හඬ නඟමු.” ලෙසයි.
100 කට වැඩි විශ්‍රාමික සිවිල් සේවකයන් පිරිසක් ඉන්දීය අගවිනිසුරු වෙත ලිඛිතව දන්වා සිටියේ ස්ත්රී දූෂකයින් නිදහස් කිරීම සියලුම කාන්තාවන්ගේ ආරක්ෂාවට දැඩි බලපෑමක් ඇති කරන බවයි.
සමූහ දූෂණයට ලක්වූ බිල්කිස් බානෝගේ පවුලේ සාමාජිකයන් 14 දෙනෙකු 2002 වසරේදී ගුජරාට් ප්‍රාන්තයේ ඇති වූ ආගමික කෝලාහලයේදී මිය ගොස් තිබුණා.
