කළු ජාතික ඇමරිකානුවකු වන ජෝර්ජ් ෆ්ලොයිඩ් ඝාතනය රූගත කළ තරුණියට පුලිට්සර් ත්යාග මණ්ඩලය විසින් විශේෂ පුවත්පත් සම්මානයක් ලබා දී තිබේ.
18 හැවිරිදි ඩාර්නෙලා ෆ්රේසියර්ගේ ධෛර්යය වෙනුවෙන් මෙම සම්මානය පිරිනමන බව පුලිට්සර් කමිටුව සම්මානය ලබා දෙමින් පවසන ලදී.
ඇගේ කෙටි වීඩියෝවෙන් ලොව පුරා වාර්ගික යුක්තිය උදෙසා විරෝධතා ඇති කළ අතර නඩු විභාගයේදී සාක්ෂි ලෙස ද උපයෝගී කර ගනු ලැබිණි.
සුදු ජාතික පොලිස් නිලධාරි ඩෙරෙක් චාවින් වරදකරුවකු බව සනාථ කිරීමට ද එම වීඩියෝව උපකාරී විය.
පුලිට්සර්ස් යනු එක්සත් ජනපදයේ වඩාත්ම කීර්තිමත් පුවත්පත් සම්මාන වේ.
පසුගිය වසරේ මැයි 25 වන දින මිනියාපොලිසිය විසින් ජෝර්ජ් ෆ්රොයිඩ් අත් අඩංගුවට ගනිද්දී ෆ්රෙසියර් සහෝදරියක් සමඟ ඒ අසලින් ඇවිද යමින් සිටියාය.
“මිනිසෙකු බියෙන් තැතිගෙන ඔහුගේ ජීවිතය ඉල්ලා හිඳගෙන සිටිනු මම දුටුවා”ඇය සියැසින් දුටු දසුන් පිළිබඳ අධිකරණය ඉදිරියේ හෙළි කරමින් පවසා සිටියාය.
“මට හුස්ම ගන්න බැහැ” ලොවක් සලිත කළ ෆ්රොයිඩ්ගේ අවසන් වචන සිහිපත් කරමින් ඇය පවසන්නේ ඔහු එම අවස්ථාවේ භීතියට පත්ව සිටි බවයි. එමෙන්ම අවසන් මොහොතේ ඔහුගේ මවට අඬ ගැසූ බවයි.
සත්යය සහ යුක්තිය උදෙසා ජනමාධ්යවේදීන්ගේ ගවේෂණයේදී පුරවැසියන්ගේ තීරණාත්මක කාර්යභාරය ඉස්මතු කරමින් ලොව පුරා පොලිස් ම්ලේච්ඡත්වයට එරෙහිව විරෝධතා අවුලුවන වීඩියෝව ධෛර්යය සම්පන්නව පටිගත කිරීම වෙනුවෙන් ගෞරවය පිරිනමමින් ඇයට මෙම සම්මානය පිරිනමන බව පුල්ට්සර් කමිටුව වැඩිදුරටත් පවසා තිබේ