රටේ උත්තරීතර නීතිය වන ආණ්ඩුක්‍රම ව්‍යවස්ථාව තුළින් ජනතාවට ලබදී ඇති භාෂණයේ, ප්‍රකාශනයේ හා උද්ඝෝෂණ ව්‍යාපාර පැවැත්වීමේ අයිතියට ඉහළින් නිරෝධායන රීතිය ක්‍රියාත්මක නොවිය යුතු බව කොළඹ අතිරේක මහේස්ත්‍රාත් ලෝචනී අබේවික්‍රම මහත්මිය අද ප්‍රකාශ කළා.
ඒ පෙරටුගාමී සමාජවාදී පක්ෂයේ මාධ්‍ය ලේකම් පුබුදු ජයගොඩ මහතාට එරෙහිව මෝදර පොලීසිය විසින් පවරා තිබු නඩුවක් ඊයේ (17) කැඳවූ අවස්ථාවේදීයි.
එහිදි වැඩිදුරටත් අතිරේක මහේස්ත්‍රාත්වරිය පැවසුවේ රට තුළ පවතින කොවිඩ්-19 වසංගත තත්ත්වය පාලනය කිරීම සඳහා නිරෝධායන රීතින් උපයෝගී කර ගැනීමේ හැකියාව පොලීසියට ඇතත්, රටේ උත්තරීතර නීතිය වන ආණ්ඩුක්‍රම ව්‍යස්ථාව මගින් රටේ ජනතාවට හිමිකර දී ඇති අයිතිවාසිකම් එමගින් මර්දනය නොකළ යුතු බවයි.
එම්.වී. එක්ස්ප්‍රස් පර්ල් නෞකාව ගිනිගැනීමෙන් සිය ජීවන උපාය මාර්ග අහිමිවූ මෝදර ප්‍රදේශවාසී ධීවර ජනතාව මෝදර ලුණුපොකුණ ප්‍රදේශයේ පැවැත්වූ සාමකාමි උද්ඝෝෂණ ව්‍යාපාරයකට සහභාගි වී සංචරණ සීමා උල්ලංඝණය කළේ යැයි චෝදනා කරමින් මෝදර පොලීසිය මෙම නඩුව ගොනුකර තිබුණා.
කෙසේ වෙතත් අදාළ සිද්ධියට අදාළව මෝදර පොලිසිය වෙත ගොස් ප්‍රකාශ ලබා දෙන ලෙසද අතිරේක මහේස්ත්‍රාත්වරිය පෙරටුගාමී සමාජවාදී පක්ෂයේ මාධ්‍ය ලේකම් පුබුදු ජයගොඩ මහතාට නියෝග කළා.
මෙම නඩුව නැවත දෙසැම්බර් 14 වැනි දින කැඳවීමට නියමිතයි.
