පරිණාමන ක්‍රියාවලියේදී මොළයට සුවිශේෂී තැනක් හිමිව ඇතැත් පුද්ගලයින් එය භාවිතා කරන ආකාරය සම්බන්ධයෙන් ගැටළුවක් පවතින බව හිටපු සෞඛ්‍ය අමාත්‍ය රාජිත සේනාරත්න මහතා පවසනවා.
ඒ මහතා මේ බව ප්‍රකාශ කර සිටියේ වත්මන් සෞඛ්‍ය අමාත්‍යවරියගේ ප්‍රකාශයක් සම්බන්ධයෙන් ඊයේ පැවති මාධ්‍ය හමුවකදී මාධ්‍යවේදීන් විමසා සිටි අවස්ථාවේදීයි.
ලෝකයේ වෙනස්කම් සිදුකළ නායකයින් සමඟ මෙරට නිරූපණ ශිල්පිනියක් වන පියුමි හංසමාලිගේ නම ඈඳා සෞඛ්‍ය අමාත්‍යවරිය ප්‍රකාශයක් නිකුත් කිරීම මෙහිදි ප්‍රශ්නයට නැගුනා.
වාසුදේව නානයක්කාර සහ තිස්ස විතාරණ මහතා හැරුණුකොට වාමාංශික නායකයන් ගැන මිනිත්තු 5ක කතාවක් සිදුකළ හැකි එක් පුද්ගලයෙක් හෝ වත්මන් ඇමති මණ්ඩලයේ නොමැති බවත් එබැවින් සෞඛ්‍ය අමාත්‍යවරිය නිකරුනේ වචන භාවිතා කරන බවත් ඔහු පවසනවා.
එමෙන්ම, විරෝධතා මැඩලීමට නිරෝධායනය යොදාගැනීම සම්බන්ධයෙන් අදහස් දක්වමින් ඒ මහතා ප්‍රකාශ කර සිටියේ උද්ඝෝෂණ පැවැත්වූ පමණින් එම උද්ඝෝෂණවලට සහභාගි වූ පුද්ගලයන් නිරෝධායනය කළ නොහැකි බවයි. නිරෝධායනය කිරීමට නම් PCR පරීක්ෂණ සිදුකළ යුතු බවත්, එසේ නැතහොත් ආසාදිතයෙකුගේ සමීපතමයෙකු ලෙස හඳුනා ගත යුතු බවත් හිටපු සෞඛ්‍ය ඇමතිවරයා පෙන්වා දෙනවා.
සෞඛ්‍යමය කාරණා සම්බන්ධයෙන් පොලීසියට මැදිහත්වීමේ කිසිදු අයිතියක් නොමැති බව පෙන්වා දෙන රාජිත සේනාරත්න මහතා පවසන්නේ ආණ්ඩුව මිලිටරි රාජ්‍යයක් කරා ශ්‍රී ලංකාව රැගෙන යමින් සිටින බවයි. කෙසේ නමුත්, මිලිටරි රාජ්‍යයක පවා සෞඛ්‍ය කාරණා සම්බන්ධයෙන් වෛද්‍ය විශේෂඥයන් තීරණය ගනිද්දී ප්‍රජාතන්ත්‍රවාදී රාජ්‍යයක මෙවැනි ක්‍රියා සිදුවිය නොහැකි බවයි ඔහු පවසන්නේ.
