දේශපාලන වශයෙන් දැඩි ලෙස විරසක වී සිටින නිමල් ලන්සා මන්ත්රීවරයා සහ පොහොට්ටුවේ නිර්මාතෘ බැසිල් රාජපක්ෂ මහතා අතර විශේෂ හමුවක් කඩිනමින් පැවැත්විය යුතු බවට ජනාධිපති කාර්යාලය විසින් යෝජනා කර තිබෙන බව දේශය පුවත් පත වාර්තා කරනවා.
කලක් බැසිල් රාජපක්ෂ මහතාගේ සමීපතමයකු ලෙස කටයුතු කළ නිමල් ලන්සා මන්ත්රීවරයා පසුව තවත් මන්ත්රී පිරිසක් සමඟ මැතිසබයේ ස්වාධීන මන්ත්රී කණ්ඩායමක් ගොඩනගා එයට නායකත්වය ලබා දෙමින් සිටිනවා.
කෙසේ හෝ මෙම විශේෂ හමුව පැවැත්වීමේ යෝජනාව ජනාධිපති රනිල් වික්රමසිංහ මහතා විසින්ම නිමල් ලන්සා මන්ත්රීවරයා වෙත ඉදිරිපත් කර තිබෙන බව සඳහන් වනවා.
මෙහිදී ලන්සා මන්ත්රීවරයා තමන්ට බැසිල් රාජපක්ෂ මහතා හමුවිය හැකි නමුත් තමන්ගේ දේශපාලන ස්ථාවරය වෙනස් නොකරන බවට ප්රකාශ කර තිබෙනවා.
ජනාධිපතිවරයාගේ මැතිවරණ මෙහෙයුම් කමිටුවට පසුගියදා බැසිල් රාජපක්ෂ මහතා කැඳවීම සම්බන්ධයෙන්ද නිමල් ලන්සා සහ අනුර යාපා යන ස්වාධීන මන්ත්රීන්ගේ නව සන්ධානයේ ප්රධානීන් දැඩි විරෝධය පළ කර තිබුණා.
මෙම විරෝධතා සමථයට ජනාධිපතිවරයා අදාළ හමුව සම්බන්ධීකරණය සඳහා වජිර අබේවර්ධන මන්ත්රීවරයා පත්කර ඇති බව සඳහන්.
ඉදිරි සතියේදී බැසිල් – ලන්සා හමුව පැවැත්වීමට බොහෝ දුරට ඉඩ ඇතැයි වැඩිදුරටත් දැනගන්නට තිබෙන බව දේශය පුවත්පත වාර්තා කරනවා.
ලන්සා පිලේ හිතුවක්කාරී වැඩ ඉදිරි ජනපතිවරණයේදී රනිල් වික්රමසිංහ මහතාට පොහොට්ටු පක්ෂයේ සහය ලබා ගැනීමට ඇති අවස්ථාව දුරස්කරමින් තිබෙන බවට වික්රමසිංහ මහතාගේ කිට්ටුවන්තයින්ගෙන් ලන්සාට චෝදනා එල්ලවෙමින් තිබෙන බවද එහි සඳහන් වනවා.