වසර 4කට සිරගත කළ ජනප්‍රිය රංගන ශිල්පී, හිටපු පාර්ලිමේන්තු මන්ත්‍රී රන්ජන් රාමනායක මහතාට ජනාධිපති සමාව ලබා දෙන්නැයි ඉල්ලමින් කලාකරුවන් ඊයේ (27) කොළඹදී ඒකාබද්ධ මාධ්‍ය හමුවක් පවත්වනු ලැබුවා.
රන්ජන් රාමනායක යනු අවංක සහ නිහතමානී කලාකරුවෙකු බවත් ඔහු රැකගත යුතු සම්පතක් බවත් ප්‍රවීණ චිත්‍රපට අධ්‍යක්ෂ සුනිල් ටී. පෙරේරා මහතා මෙහිදී ප්‍රකාශ කර සිටියා.
මාධ්‍ය හමුවේ අදහස් දක්වමින් ප්‍රවීණ චිත්‍රපට අධ්‍යක්ෂ උදයකාන්ත වර්ණසූරිය මහතා පවසා සිටියේ වචන කිහිපයක් හේතුවෙන් රන්ජන් රාමනායකට වසර 4කට සිරගත වීමට සිදුවීම ගැන ඉතාමත් කණගාටු වන බවයි,
මෙහිදී වැඩිදුරටත් අදහස් දැක්වූ උදයකාන්ත වර්ණසූරිය මහතා,
“මට රෑට නිදා ගන්න කොට මගේ ඇදේ මට හිතෙනවා රන්ජන් මේ වෙලාවේ කොහොමද නිදාගන්නවා ඇත්තේ කියලා හරිම දුකක් දැනෙනවා සුන්දර හදවතක් තිබුණ මනුස්සයෙක් නීතිය සම්බන්ධව වචන පේලියක් නිසා අපි නොහිතපු විදිහට අවුරුදු 4ක් සිරගතට වෙන්න සිද්ධ වෙලා තියෙනවා. හරිම කණගාටුදායක තත්ත්වයක් ගොඩක් දේවල් කරන්න බෑ කරන්න පුළුවන් එකමදේ ජනාධිපතිතුමාගනේ ඒ වෙනුවෙන් ජනාධිපති සමාවක් ලබා ගැනීමට ආයාචනයක් කිරීම පමණයි”
මෙහිදී අදහස් දැක්වූ රංගන ශිල්පි අර්ජුන් කමලනාත් මහතා,
“මේ ආණ්ඩුව අපි ගෙනාපු ආණ්ඩුව. මම, අනූෂා සල්ලි අරගෙන නෙමෙයි දේශපාලනය කළේ, මේ ආණ්ඩුවට අතින් වියදම් කරගෙන රට වෙනුවෙන්. ඒ නිසා අපිට අයිතියක් යුතුකමක් තියෙනවා මේ වෙලාවේ අපේ කලාකරුවෙක් වෙනුවෙන් අපිටත් ආණ්ඩුවෙන් ඉල්ලීමක් කරන්න. එකම ඉල්ලීමයි කරන්නේ මම, මට මගේ අයියව නිදහස් කරලා දෙන්න.”
