ඉතා වැරදි සහ වෛරී මත පැතිරවීම් සමාජ මාධ්‍ය හරහා සිදුවන බැවින් සමාජ මාධ්‍ය නියාමනයකට ලක් කළයුතු බව ශ්‍රී ලංකා පොදුජන පෙරමුණේ මහලේකම්, පාර්ලිමේන්තු මන්ත්‍රී සාගර කාරියවසම් මහතා පවසනවා.
ඒ, ඊයේ (21) පාර්ලිමේන්තුව අමතමින්.
සමාජ මාධ්‍ය සම්බන්ධයෙන් කිසිඳු නීති රාමුවක් නොමැති බවයි ඔහු පෙන්වා දෙන්නේ.
තරුණ පරපුරේ ප්‍රධාන ප්‍රවෘත්ති මාධ්‍ය බවට සමාජ මාධ්‍ය පත්ව ඇති බවත් ඔවුන් පුවත්පත් කියවීමෙන් සහ රූපවාහිනී ප්‍රවෘත්ති බැලීමෙන් බොහෝදුරට ඈත්වෙච්ච පිරිසක් හෙයින් තමන්ගෙ තොරතුරු ලබාගැනීමේ ප්‍රධාන මාධ්‍ය ලෙස ඔවුන් සමාජ මාධ්‍ය භාවිතා කරන බවත් ඔහු පවසනවා.
“මේ සමාජ මාධ්‍යවල වැරදි තොරතුරු යෑම මං හිතන්නෙ මේ රටට වින කරන, මේ රටේ ස්ථාවරභාවය නැතිකරන පිරිස් එය ඉතාම හොඳ අවස්ථාවක් කරගෙන, එය තෝතැන්නක් කරගෙන තියෙනවා. අපි දන්නවා මේ රටේ නිදහසෙන් පස්සෙ මේ රට වඩාත්ම සංවර්ධනය කරපු නායකයා මහින්ද රාජපක්ෂ ගරු හිටපු ජනාධිපතිතුමාට එරෙහිව සමාජ මාධ්‍ය කොහොමද කටයුතු කළේ කියලා පහුගිය කාලේ. අද වනවිටත් එවැනිම වූ තත්වයක් සමාජ මාධ්‍ය තුළ නැවත ඇතිකරමින් ක්‍රියාත්මක කරමින් යනවා.
ඒක නිසා මම යෝජනා කරන්න කැමතියි මේ සමාජ මාධ්‍යවල පළවන තොරතුරු – මම කියන්නෙ සමාජ මාධ්‍ය තහනම් කරන්න කියන එක නෙවෙයි – මේ තොරතුරුවල සත්‍ය අසත්‍යතාවය සොයලා ඒ තොරතුරේ අඩංගු කරුණු සම්බන්ධයෙන් යම්කිසි ආයතනයක් මගින් සොයලා එහි නිවැරදිතාවය සම්බන්ධයෙන් ප්‍රකාශයක් කරන්න පුළුවන් නම් නියාමනයක් කරන්න පුළුවන් නම් මං හිතන්නෙ මේ රටට කරන සුගතියක්, මේ රටට කරන උදව්වක්”
