කොලඹ නගර සභාවේ නගරාධිපති අපේක්ෂක ධුරය සඳහා තරඟ වැදීමට සමගි ජන බලවේගය පක්ෂයේ පාර්ලිමේන්තු මන්ත්‍රී මුජිබර් රහ්මාන් මහතා නම් කර තිබෙනවා.
එම පක්ෂයේ මහලේකම් රංජිත් මද්දුම බණ්ඩාර මහතා පවසන්නේ ඒ සඳහා සමගි ජන බලවේගයේ කෘත්‍යාධිකාරී මණ්ඩලයේ ඒකමතික අනුමැතිය හිමිවූ බවයි.
මේ වන විට කොළඹ නගරාධිපති ධූරය එක්සත් ජාතික පක්ෂයෙන් තේරී පත්වූ රෝසි සේනානායක මහත්මිය දරනු ලබනවා.
කෙසේවෙතත් පසුගිය මැතිවරණයේදී එක්සත් ජාතික පක්ෂය කොළඹින් දරුණු පරාජයකට ලක්වූ අතර මැතිවරණයට ඉදිරිපත්වූ කිසිදු අපේක්ෂකයෙකු ජයග්‍රහණය නොකිරීමද විශේෂත්වයක්.
මීට පෙර කොළඹින් ඡන්ද ලක්ෂ ගණනක් ලබාගත් රනිල් වික්‍රමසිංහ මහතාද එම මැතිවරණයෙන් පරාජයට පත්වුණා.
මෙවන් තත්ත්වයක් තුළ තවදුරටත් කොළඹ නගරසභා බල ප්‍රදේශය තුළ එක්සත් ජාතික පක්ෂයට බලයක් හිමි නොවන තත්ත්වයක් තුළ සමගි ජනබලවේගය පක්ෂය තම පාර්ලිමේන්තු මන්ත්‍රීවරයෙකු ලංකාවේ ප්‍රභලම මහ නගර සභාව වන කොළඹ නගර සභාවට ඉදිරිපත් කිරීම විශේෂත්වයක්.
