සමගි ජන බලවේගය පක්ෂයේ ප්‍රධාන සංවිධායක තිස්ස අත්තනායක මහතාගේ දියණියය වන දුල්මිණි ඉන්ද්‍රචාපා අත්තනායක මෙනෙවිය ආණ්ඩුව ඕස්ට්‍රේලියාවේ ශ්‍රී ලංකා මහකොමසාරිස් කාර්යාලයේ තෙවන ලේකම් ධූරයක් ලබාදීම පිළිබඳව එම පක්ෂයේ මන්ත්‍රීවරුන් බහුතරයක් විරෝධය පලකර තිබෙනවා.
මේ සමගම සමගි ජනබලවේගයේ සිටිමින් වත්මන් ආණ්ඩුව සමඟ යළිත් ඩීල් දේශපාලනයේ යෙදෙන මන්ත්‍රීවරුන් පිරිසක් පිළිබදව කතාබහක්ද ඉස්මතුව තිබෙනවා.
තිස්ස අත්තනායක මහතාගේ දියණියගේ පත්වීමට විරෝධය දක්වන සමගි ජනබලවේගයේ මන්ත්‍රීවරුන් ප්‍රකාශ කරන්නේ මෙම සිද්ධියෙන් ආණ්ඩුව හා අත්තනායක මහතා අතර තිබෙන රහසිගත සබඳතා පෙන්නුම් කරන බවයි.
සජිත් ප්‍රේමදාස මහතා සමඟ එක්ව සමගි ජනබලවේගය නිර්මාණය කිරීමට මුලිකයෙකු ලෙස තිස්ස අත්තනායක මහතා කටයුතු කලද ඊට පෙර ඔහුගේ ක්‍රියාකලාපය දැඩිව විවේචනය කෙරුණා.
2015 ජනාධිපතිවරණය පැවැත්වීමට මාස කිහිපයක් තිබියදී තිස්ස අත්තනායක මහතා මහින්ද රාජපක්ෂ ආණ්ඩුව හා ඒකවූ අතර ඉන් පසුව ඔහුට සෞඛ්‍ය අමාත්‍ය ධූරයද හිමිවූවා.
ඔහු ආණ්ඩුවට එක්වීමෙන් අනතුරුව රනිල් වික්‍රමසිංහ මහතා හා මෛත්‍රිපාල සිරිසේන මහතා අතර රහස් ගිවිසුමක් ඇතැයි පවසමින් කූඨ ලේඛණයක් ඉදිරිපත් කිරීම නිසා පසුව සිරගතවීමට ද සිදුවූවා.
නැවත සමගි ජනබලවේගයට ඔහු එක්වූ පසුව පෙර වැරදි අමතක කොට සමගි ජන බලවේගයේ කෘත්‍යාධිකාරී මණ්ඩලයට පවා පත්කොට ජාතික සංවිධායක තනතුරද ලබාදීමෙන් පසුවද එවැන්නක් සිදුවීම සම්බන්ධයෙන් එම පක්ෂයේ බහුතරයක් තුළ කළකිරීමක් ඇතිව තිබෙනවා..
සිරගතව සිටියදී තමන් ලැබූ අත්දැකීම් අලලා තිස්ස අත්තනායක මහතා ග්‍රන්ථයක් ලියූ අතර එය පසුගියදා මහින්ද රාජපක්ෂ මහතාටද පිළිගැන්වීමට කටයුතු කිරීම පිළිබදවද විවේචන එල්ලවී තිබුණා.
