බාලවයස්කාර දැරියක් දූෂණය කිරීමේ චෝදනාවට වරදකරු වී වසර 15 ක සිර දඬුවම් නියම වී සිටින තමා එම දඬුවමට එරෙහිව අභියාචනයක් ඉදිරිපත් කර තිබෙන හෙයින් තමන්ව ඇප මත මුදාහරින ලෙස ඉල්ලා අකුරැස්ස ප්‍රාදේශීය සභාවේ හිටපු සභාපති සාරුව ලියනගේ සුනිල් මහතා ඉදිරිපත් කළ ඇප ඉල්ලීමක් කොළඹ මහාධිකරණය විසින් ප්‍රතික්ෂේප කළේය.
මෙම ඉල්ලීම කොළඹ මහාධිකරණ විනිසුරු ආදීත්‍ය පටබැඳිගේ මහතා ඉදිරියේ සලකා බැලීම සිදුවිය.
එහිදී දඬුවම් නියම වී සිටින විත්තිකාර සුනිල් මහතා වෙනුවෙන් පෙනී සිටි නීතිඥවරයා අධිකරණයට කරුණු දක්වමින් තම සේවාදායකයාට නියම වී ඇති සිර දඬුවමට එරෙහිව ඔහු විසින් අභියාචනාධිකරණය වෙත පෙත්සමක් ඉදිරිපත් කර තිබෙන බව දැනුම් දුන්නේය.
ඒ අනුව අභියාචනය විභාග කොට අවසන් තීන්දුවක් ලබාදෙන තුරු තම සේවාදායකයා ඇපමත මුදාහැරීමේ නියෝගයක් නිකුත් කරන ලෙස එම නීතිඥවරයා අධිකරණයෙන් ඉල්ලා සිටියේය.
එහෙත් විත්තිකරු ඇපමත මුදාහැරීමට තරම් සුවිශේෂී කරුණු කිසිවක් අනාවරණය නොවන බව තීන්දු කළ මහාධිකරණ විනිසුරුවරයා එම ඇප ඉල්ලීම ප්‍රතික්ෂේප කිරීමට තීන්දු කළේය.
2012 වසරේ බාලවයස්කාර දැරියක් දූෂණය කිරීමේ චෝදනාවට වරදකරු කෙරුණු අකුරැස්ස ප්‍රාදේශීය සභාවේ හිටපු සභාපති සාරුව ලියනගේ සුනිල් මහතාට කොළඹ මහාධිකරණ විනිසුරු ආදිත්‍ය පටබැඳිගේ මහතා විසින් බරපතළ වැඩ සහිත වසර 15ක සිර දඬුවම් නියම කර තිබුණි.
ඊට අමතරව රුපියල් 25,000/- ක දඩයක් සහ වින්දිත දැරියට රුපියල් 250,000ක් වන්දි මුදලක් ගෙවන ලෙසත් විනිසුරු වරයා විසින් විත්තිකරුට නියම කරනු ලැබීය.
