2023 ආසියානු කුසලාන ක්‍රිකට් තරඟාවලියේ කොළඹ සහ මහනුවරදී පැවති තරඟවලට වර්ෂාවෙන් සිදු වූ බාධාවන් වැළැක්වීම සඳහා සහාය දැක්වූ ක්‍රීඩාංගණ කාර්යමණ්ඩලය සහ බිම් සේවකයන් සඳහා ත්‍යාගය මුදල් ලබාදීමට ආසියානු ක්‍රිකට් කවුන්සිලය සහ ශ්‍රී ලංකා ක්‍රිකට් ආයතනය තීරණය කර තිබෙනවා.
ආසියානු ක්‍රිකට් කවුන්සිලයේ සභාපති ජේ ෂා මහතා ට්විටර් පණිවුඩයක් තබමින් පවසා ඇත්තේ ක්‍රීඩාංගණ බිම් සේවකයන් සඳහා ත්‍යාගයක් ලෙස අමෙරිකානු ඩොලර් 50,000 මුදලක් ලබා දීමට තීරණය කළ බවයි.
ඔවුන්ගේ නොසැලෙන කැපවීම සහ වෙහෙස මහන්සි වී වැඩකිරීම, මෙවර ආසියානු කුසලාන තරඟාවලියේ අමතක නොවන මතකයක් බවට පත් වන බවද ඒ මහතා සිය ට්විටර් සටහනෙන් දැනුම් දී තිබෙනවා.
මේ අතර ඊයේ (17) පැවති ආසියානු කුසලාන අවසන් මහා තරඟයේ වීරයා වූ ඉන්දීය කණ්ඩායමේ මොහොමඩ් සිරාජ්ද තමන්ට ලැබුනු අමෙරිකානු ඩොලර් 5,000 ක ත්‍යාග මුදල ක්‍රීඩාංගණ බිම් සේවකයින්ට ප්‍රදානය කර තිබෙනවා.
ක්‍රීඩාංගණ බිම් සේවකයින් වෙත සිදු කරන අගය කිරීමක් ලෙස සිරාජ් විසින් අදාළ චෙක්පත ඔවුන්ට පිරිනමා ඇති බවටයි වාර්තා වන්නේ.
“ඔවුන්ගේ සහයෝගය නොමැති නම් මෙම තරඟාවලිය පැවැත්විය නොහැකිව තිබුණා”, යනුවෙන් ඉන්දීය ක්‍රීඩක සිරාජ් තවදුරටත් පවසා තිබෙනවා.
