කොළඹ සිරිමාවෝ බණ්ඩාරනායක විද්‍යාලයේ බාලිකා නේවාසිකාගාරය මේ වන විටත් වසා දමා ඇති බව දෙමාපියන් චෝදනා කරනවා.
මේ හේතුවෙන් තම දරුවන් අධ්‍යාපනය ලැබීමට නොහැකිව දැඩි අසීරුතාවයට පත්ව ඇති බවයි දෙමාපියන් පෙන්වා දෙන්නේ.
පසුගිය 19 වනදා පැවති දෙමාපිය රැස්වීමේදී නේවාසිකාගාර බලධාරීන් දෙමාපියන්ට දැනුම්දී ඇත්තේ නේවාසිකාගාරය පවත්වාගෙන යෑමට ගෑස් නොමැති බවත් දෙමාපියන් විසින් නේවාසිකාගාරයට අවශ්‍ය කරන ගෑස් ලබාදෙන්නේ නම් එය යළිත් විවෘත කරන බවයි.
එමෙන්ම නේවාසිකාගාර ගාස්තුද විශාල වශයෙන් ඉහළ දමා තිබෙනවා.
5 වසර ශිෂ්‍යත්ව විභාගය සමත්වී දුරබැහැර සිට සිරිමාවෝ විද්‍යාලයට තේරී පත්වූ සිසුවියන් 48 දෙනෙකු පමණ මේ වන විට අදාළ නේවාසිකාගාරයේ රැදී සිටිනවා.
මේ වන විට පාසල් නැවත ආරම්භවී ඇතත් නේවාසිකාගාරය වසා තැබීම හේතුවෙන් කටුවන, පිටබැද්දර, කොටපොල, අකුරැස්ස, අම්පාර, අනුරාධපුරය, බිබිල, මතුගම වැනි දුර පළාත්වල පදිංචි මෙම දරුවන් පිරිස අධ්‍යාපනය ලැබීමට නොහැකිව තවමත් නිවෙස්වල රැදී සිටිනවා.
දෙමාපියන් පවසන්නේ දිනපතා පෞද්ගලික වාහනයක හෝ පොදු ප්‍රවාහන සේවයේ පාසල් ඒමට හැකි දුරකින් තම දරුවන් පදිංචිව නොසිටින බවයි.
ඉන්ධන නොමැතිකමින් පෞද්ගලික වාහනයක් යොදාගෙන හෝ දරුවන් පාසල් ගෙන ඒමට නොහැකි තත්ත්වයක් උදාවී ඇති බවත් මේ තත්ත්වය උඩ තම දරුවන් දැඩි අසරණභාවයට පත්ව ඇති බවත් දෙමාපියන් චෝදනා කරනවා.
