දකුණු අප්‍රිකාවේ උතුරුදිග දේශසීමාව ආසන්න ප්‍රදේශයකදී ට්‍රක් රථයක් සහ බස් රථයක් එකිනෙක ගැටීමෙන් පුද්ගලයින් 20 දෙනෙකු මියගොස් තිබෙනවා.
සිම්බාබ්වේ දේශසීමාවට ආසන්න ලිම්පෝපෝ පළාතේදී එම අනතුර සිදුව ඇති බවයි වාර්තා වෙන්නේ.
විදෙස් මාධ්‍ය වාර්තා කරන්නේ පතල් කැනීම්වල නිරතව සිටින කම්කරුවන් පිරිසක් අනතුරට ලක් වූ බස් රථයේ ගමන් කර ඇති බවයි.
මෙම කම්කරුවන් දකුණු අප්‍රිකාවේ විශාලතම දියමන්ති ආකරවලින් එකක් වන De Beers සමාගම සතු පතලක සේවය සඳහා යන අතරතුර මෙම අනතුරට ලක්ව තිබෙනවා.
අනතුර සම්බන්ධ මූලික විමර්ශනවලදී අනාවරණය වී ඇත්තේ ට්‍රක් රථයේ රියදුරුට බලපත්‍රයක් නොමැති අතර එම රථය ධාවනය සඳහා සුදුසු නොවන තත්ත්වයක පැවති බවයි.
ඉතා දියුණු මාර්ග පද්ධතියක් පැවතුණද දකුණු අප්‍රිකාව තුළ මාර්ග ආරක්ෂාව සම්බන්ධයෙන් ගෙන ඇති පියවර ඉතා අවම බවද විදෙස් මාධ්‍ය පෙන්වා දෙනවා.
