ඉදිරි සියලු මැතිවරණවලදී දෘශ්‍යබාධිත පුද්ගලයින් වෙනුවෙන් විශේෂ ඡන්ද පත්‍රිකාවක් ලබාදීමට තීරණය කර තිබෙනවා.
සෑම ඡන්ද මධ්‍යස්ථානයකදීම එවැනි පුද්ගලයින් වෙනුවෙන් විශේෂ ඡන්ද පත්‍රිකාවක් නිකුත් කෙරෙන බව, මැතිවරණ කොමසාරිස් ජෙනරාල් සමන් රත්නායක මහතා පැවසුවා.
ඔහු ප්‍රකාශ කළේ, මීට පෙර නුවරඑළිය දිස්ත්‍රික්කයේ ඡන්ද මධ්‍යස්ථාන 10ක නියමු ව්‍යාපෘතියක් ලෙස එම වැඩසටහන සාර්ථක වූ බවයි.
මැතිවරණ කොමසාරිස් ජනරාල්වරයා මේ බව පැවසුවේ, ආබාධ සහිත තැනැත්තන් සඳහා වන පාර්ලිමේන්තු සංසදයේ විශේෂ ප්‍රවෘත්ති සාකඡාවට එක්වෙමින්.
මීට අමතරව, ඡන්ද මධ්‍යස්ථානවල ශ්‍රව්‍යාබාධිත ප්‍රජාවගේ අවශ්‍යතා සහ ආබාධ සහිත ප්‍රජාවගේ ප්‍රවේශය සදහා විශේෂ අවධානය යොමු කරන බවද, ඔහු පැවසුවා.
මැතිවරණ කොමසාරිස් ජෙනරාල් සමන් රත්නායක මහතා සඳහන් කළේ, ආබාධිත ප්‍රජාවට හැඳුනුම්පතක් ලබා දීමටත් පියවර ගන්නා බවයි.
මේ අතර, මෙවර අයවැයෙන් බස් රථ 600ක් මිලදී ගැනීම සදහා යෝජනාවක් පවතින බැවින් ඉන් බස්රථ කිහිපයක් හෝ ආබාධ සහිත තැනැත්තන් වෙනුවෙන් මිලදීගෙන නියමු ව්‍යාපෘතියක් ක්‍රියාත්මක කිරීමට අදාළ යෝජනාවක් අද පාර්ලිමේන්තුවට ඉදිරිපත් කරන බවයි.ආබාධ සහිත තැනැත්තන් සඳහා වන පාර්ලිමේන්තු සංසදයේ සභාපති ඩලස් අලහප්පෙරුම මහතා පැවසුවා.
