ව්‍යාජ කොවිඩ් එන්නත් කිරීමේ මාර්ගෝපදේශ සකස් කිරීම සහ එන්නත් කුප්පි 25,000 ත් 30,000 ත් අතර ප්‍රමාණයක් නාස්ති කිරීම හේතුවෙන් වසංගත රෝග විද්‍යා ඒකකයේ විශේෂඥ වෛද්‍යවරුන්ට එරෙහිව නීතිමය පියවර ගන්නා ලෙස රජයේ වෛද්‍ය නිලධාරීන්ගේ සංගමය සෞඛ්‍ය අමාත්‍යාංශයෙන් ඉල්ලීමක් කර තිබේ.
පෙරේදා (9) දිනයේ වතුපිටිවල රෝහලේ සේදුම් කාමරයකින් මාත්‍රා දෙක හෝ තුන යන ප්‍රමාණයන්ගෙන් ඉතිරි වූ කොවිඩ් එන්නත් සොයා ගැනීමත් සමඟ මෙම තත්ත්වය මතු වූ බව එම සංගමයේ ලේකම් වෛද්‍ය සෙනල් ප්‍රනාන්දු මහතා මාධ්‍ය වෙත පැවසුවේය.
කොවිෂීල්ඩ් එන්නත පිළිබඳ මූලික මාර්ගෝපදේශය සෞඛ්‍ය වෛද්‍ය නිලධාරීන් සහ සියලුම රෝහල්වලට නිකුත් කරනු ලැබුවේ වසංගත රෝග විද්‍යා ඒකකයේ විශේෂඥයින් විසිනි.
‘අවසාන මාත්‍රාවෙන් පසුව එන්නත් කුඩා ප්‍රමාණයක් ඉතිරිව තිබේ නම් එය වෙනත් පුද්ගලයෙකු සඳහා භාවිතා නොකළ යුතුය’.යන්න එම මාර්ගෝපදේශයන්හි සඳහන් කර තිබිණි.
එකී මාර්ගෝපදේශ ක්‍රියාත්මක කිරීමෙන් පසු වැඩසටහනේ පළමු අදියරේදී එන්නත් කුප්පි 25,000 ත් 30,000 ත් අතර ප්‍රමාණයක් නාස්ති වූ බව වෛද්‍ය ප්‍රනාන්දු මහතා පැවසීය.
