ස්විට්සර්ලන්තය සහ ඔස්ට්‍රියාව අතර පිහිටි ගොඩබිමින් වටවූ කුඩා රාජ්‍යයක් වන ලිච්ටෙන්ස්ටයින් රාජ්‍ය සමඟ රාජ්‍ය තාන්ත්‍රික සබදතා ඇතිකර ගැනීම සදහා කැබිනට් අනුමැතිය හිමිවී තිබෙනවා.
අර්ධ ව්‍යාවස්ථාමය රාජාණ්ඩුවක් වන ලිච්ටෙන්ස්ටයින් රාජ්‍යයෙහි ව්‍යවස්ථාදායක රජවරයෙක් රටේ නායකයා ලෙස කටයුතු කරනවා.
ප්‍රධාන වශයෙන් ඖෂධ, ඉලෙක්ට්‍රොනික උපකරණ නිපදවන මෙම රටෙහි පසුගිය වසරේ දළ ජාතික නිෂ්පාදිතය ඇමරිකානු ඩොලර් බිලියන 5.8 ක් පමණ වන අතර ඒක පුද්ගල ආදායම ඇමරිකානු ඩොලර් 143,700 ක් පමණ වනවා.
කැබිනට් තීරණ දැනුම්දීමේ ප්‍රවෘත්ති සාකච්ඡාවේදී අමාත්‍ය කෙහෙළිය රඹුක්වැල්ල මහතා පැවසූයේ ද්වී පාර්ශවික හා බහුපාර්ශවික සහයෝගීතාවය වර්ධනය කරගැනීම සදහා ශ්‍රී ලංකාව සමඟ රාජ්‍යතාන්ත්‍රික සබදතා ස්ථාපිත කරගැනීමට ලිච්ටෙන්ස්ටයින් රජය කැමැත්ත ප්‍රකාශ කර ඇති බවයි.
ඒ අනුව ලිච්ටෙන්ස්ටයින් රාජ්‍ය සමඟ රාජ්‍ය තාන්ත්‍රික සබදතා ස්ථාපිත කිරීම සදහා විදේශ අමාත්‍ය දිනේෂ් ගුණවර්ධන මහතා ගෙන ආ යෝජනාවට කැබිනට් අනුමැතිය හිමිව තිබෙනවා.
කෙසේ වෙතත් ලිච්ටෙන්ස්ටයින් රාජ්‍ය යනු කලක් ප්‍රකෝටිපතියන්ගේ බදු තෝතැන්නක් ලෙස හැදින්වූ රාජ්‍යයෙකි.
එනම් සුපිරි ධනවතුන් සිය බදු පැහැර හැරීම් සදහා අක්වෙරළ ගිණුම්වල (offshore accounts) මුදල් දැමීමට ලිච්ටෙන්ස්ටයින් රාජ්‍ය යොදාගෙන තිබෙනවා.
මේ හේතුවෙන් එම රාජ්‍ය කලක් අසාදු ලේඛණගතවද පැවතුණා.
සීෂෙල්ස් රාජ්‍යයද මෙලෙස අක්වෙරළ ගිණුම් (offshore accounts) පවත්වාගෙන යාමට ප්‍රසිද්ධියක් දරණ රටකි.
