පවත්නා නීති සම්පාදනය, අතීත භාවිතයන් සහ ජාත්‍යන්තර හොඳම භාවිතයන් පිළිබඳව අධ්‍යයනය කරමින් 1979 අංක 48 දරණ ත්‍රස්තවාදය වැළැක්වීමේ පනතේ විධිවිධාන නැවත සලකා බැලීමට කටයුතු කරමින් සිටින බව විදේශ අමාත්‍යාංශය යුරෝපා සංගමයට දැනුම් දී තිබේ.
ත්‍රස්තවාදය වැළැක්වීමේ පනත සමාලෝචනය කිරීමට සහ ඒ සඳහා වූ වාර්තාවක් මාස තුනක් ඇතුළත කැබිනට් මණ්ඩලයට ඉදිරිපත් කිරීම සඳහා කැබිනට් අනු කමිටුවක් සහ නිල කමිටුවක් පත් කිරීමට ජුනි 21 වන දින අමාත්‍ය මණ්ඩලය ගත් තීරණය පිළිබඳව යුරෝපා සංගමයට මෙසේ දැනුම් දී ඇතැයි සඳහන් වේ.
මේ සඳහා වන නිල කමිටුව අධිකරණ,ආරක්ෂක,විදේශ කටයුතු මහජන ආරක්ෂාව යන අමාත්‍යාංශවල සහ නීතිපති,නීති කෙටුම්පත්,ශ්‍රී ලංකා පොලිසිය සහ ජාතික බුද්ධි අංශ ප්‍රධානි කාර්යාලය යන ආයතනයන්හි ජ්‍යෙෂ්ඨ නියෝජිතයන්ගෙන් සමන්විත වන අතර අදාළ පත්වීම් ජුනි මස 24 වන දින සිදු කර ඇතැයි පැවසේ.
එමෙන්ම වරදකරුවන් කොට සිරදඬුවම් නියම කරන ලද එල්ටීටීඊයේ හිටපු සාමාජිකයන් 16 දෙනෙකු වෙත ආණ්ඩුක්‍රම ව්‍යවස්ථාවේ 34 වන වගන්තිය ප්‍රකාරව ජනාධිපතිවරයා විසින් සමාව දීම පිළිබඳව ද යුරෝපා සංගමය දැනුම්වත් කිරීමට රජය කටයුතු කර තිබේ.
