ශ්‍රී ලංකාවට පමණක් කොරෝනා ඩෙල්ටා ප්‍රභේදයෙන් ගැළවීමට නොහැකි බව රාජ්‍ය අමාත්‍ය මහාචාර්ය චන්න ජයසුමන මහතා පවසනවා.
ඒ මහතා මේ බව ප්‍රකාශ කර සිටියේ අනුරාධපුර ප්‍රදේශයේ දී මාධ්‍ය වෙත අදහස් දක්වමින්.
මුළු ලොව පුරා ම ඩෙල්ටා ප්‍රභේදය ප්‍රමුඛ ප්‍රභේදය බවට පත්වෙමින් ඇති බව පෙන්වා දෙන ඒ මහතා වැඩිදුරටත් පවසන්නේ ඉදිරියේ දී ඩෙල්ටා ප්‍රභේදය මෙරට තුළ සුලභ වශයෙන් පැතිරීයාම බලාපොරොත්තු වන ලෙසයි.
කෙසේ වෙතත් දැනට ලබාදෙන සයිනොෆාම්, ඇස්ට්‍රාසෙනෙකා, මොඩර්නා සහ ෆයිසර් කියන එන්නත් සියල්ලෙන්ම සහ ස්පුට්නික් එන්නතෙන් ඩෙල්ටා ප්‍රභේදය සඳහා විශේෂ ආවරණයක් ලැබෙන බව විද්‍යාඥයින් පෙන්වා දී ඇති බවත් එන්නත් ලබාගත් අයට ඩෙල්ටා ප්‍රභේදය වැලඳුනත්, ඉන් ඇතිවෙන්නේ අවම බලපෑමක් බවත් ඔහු පෙන්වා දෙනවා.
එබැවින්, එන්නත්කරණය ඉතාම වැදගත් වන බවයි ඒ මහතා පෙන්වා දෙන්නේ.
එමෙන්ම, දකුණු අමෙරිකාවේ පේරු රට කේන්ද්‍ර කරගෙන ඇති වු ලැම්ඩා කියන ප්‍රභේදය රටවල් ගණනාවක පැතිරෙමින් පවතින බවත් අමෙරිකා එක්සත් ජනපදයේ කැලිෆෝනියා ප්‍රාන්තයේ පටන් ගත්ත එප්ස්සයිලන් නමින් හඳුන්වන තවත් නව ප්‍රභේදයක් මේ වන විට රටවල් ගණනාවක පැතිරෙමින් පවතින බවත් මේ සියල්ල ගැන අවධානයෙන් පසුවෙන බවත් රාජ්‍ය අමාත්‍යවරයා අවධාරණය කර සිටිනවා.
