සංචාරක ඉන්දීය කණ්ඩායම සහ ශ්‍රී ලංකාව අතර T20 තරඟාවලියේ තෙවන සහ අවසන් තරගය කොළඹ ආර්. ප්‍රේමදාස ක්‍රීඩාංගණයේදී පැවැත්වුණා.
තරඟයේ කාසිය වාසිය දිනූ ඉන්දීය නායක ශිකර් ධවාන් පළමුව පන්දුවට පහරදීමට තීරණය කළා.
නමුත් ඉන්දීය ඉනිම කඩුලු 8ක් දැවී ලකුණු 81 කට සීමා වුණා.
එය T20 තරඟයක ශ්‍රී ලංකාවට එරෙහිව ඉන්දීය කණ්ඩායමක් වාර්තා කළ අඩුම ලකුණු සංඛ්‍යාවයි.
එමෙන්ම ඉන්දීය කණ්ඩායම වාර්තා කළ තෙවැනි අඩුම ලකුණු සංඛ්‍යාවද වනවා.
ඊයේ සිය 24වන උපන්දිනය සැමරූ වනිඳු හසරංග ඉන්දීය ඉනිම සුණු විසුණු කළා.
සිය පන්දුවාර හතර තුල ලකුණු 9ක් පමණක් ලබා දුන් වනිඳු ඉන්දීය ඉනිමේ කඩුලු 4ක් දවා ගත්තා.
එය ඡන්ම දිනයේ පන්දු යවන්නෙක් වාර්තා කළ හොඳම පන්දු යැවීමයි.
එය ඉන්දීය කණ්ඩායමට එරෙහිව ඕනෑම ක්‍රීඩකයෙක් වාර්තා කළ හොඳම පන්දු යැවීමද වනවා.
ඊට අමතරව දසුන් ශානක කඩුලු 2ක් දවා ගත්තා.
ඉන්දීය ඉනිමේ වැඩිම ලකුණුලාභියා වූ කුල්දීප් යාදව් නොදැවී ලකුණු23ක් ලබා ගත්තා.
ලකුණු 36ට කඩුලු 5ක් දැවී තිබුණු අවස්ථාවක භුවනේෂ්කුමාර් (16*) සමග එක්ව කුල්දීප් ඉන්දියාව T20 තරගයක ඉන්දීය කණ්ඩායම වාර්තා කළ අඩුම ලකුණු සංඛ්‍යාවේ සීමාවෙන් (74 – ඔස්ට්‍රෙලියාව හමුවේ, 2008) ඔබ්බට කණ්ඩායම රැගෙන ගියා.
ලකුණු 82ක ජයග්‍රාහී ඉලක්කය පහසුවෙන් සපුරා ගැනීමට ඉන්දීය පන්දු යවන්නන් ඉඩ ලබා දුන්නේ නැහැ.
ඒ අනුව ශ්‍රී ලංකා කණ්ඩායම ඉනිමේ 15වන පන්දුවාරයේ තුන්වන පන්දුවේදී ජයග්‍රහණය ලබා ගන්නා විට කඩුලු තුනක් බිඳ වැටී තිබුණා.
එම කඩුලු තුනම රාහුල් චාහ්ර් දවා ගත්තා.
මෙම ජයත් සමග තරගාවලි පහකට පසු ශ්‍රී ලංකා කණ්ඩායම T20 තරගාවලියක් ජය ගැනීමට සමත් වුණා.
ශ්‍රී ලංකා කණ්ඩායම අවසන් වරට T20 තරගාවලියක් ජයගත්තේ 2019 වසරේදීයි.
පාකිස්තානයට එරෙහිව ලබා ගත් එම ජයග්‍රහණයේදීත් කණ්ඩායම් නායකයා ලෙස කටයුතු කළේ දසුන් ශානක වීම විශේෂත්වයක්.
මෙම තරගාවලි ජය ඉන්දියාවට එරෙහිව ලැබූ පළමු T20 තරඟාවලි ජයග්‍රහණයද වනවා.
