නිහඬ බව යනු තවත් හඬක් වන අතර එහි වැදගත් අර්ථ‍යක් තිබිය හැකි බව කර්මාන්ත අමාත්‍ය විමල් විරවංශ මහතා පවසනවා.
ඒ අද (10) කඩුවෙල ප්‍රදේශයේ පැවති වැඩසටහනකින් අනතුරුව මාධ්‍ය වෙත අදහස් දක්වමින්.
කඩා වැටුණු ආර්ථිකය ගොඩගැනීමට බැසිල් රාජපක්ෂ මහතාට හැකිවෙතැයි විශ්වාසයක් පවතින්නේද යන්න පිළිබඳව මාධ්‍යවේදීන් විමසා සිටීමේදී ඊට පිළිතුරු දුන් අමාත්යවරයා,
”ආර්ථිකයේ තිබෙන අභියෝගය ජයග්‍රහණය කරන්න පුළුවන් නම් ඒක ඉතා වැදගත්. මම දන්නේ නැහැ එතුමාට ඒක කරන්න පුළුවන් වෙයිද බැරි වෙයිද කියල. ඒ අභියෝගය ජයග්‍රහණය කරන්න පුළුවන් නම් ඒක ඉතා වැදගත්.”
ජනාධිපතිතුමා සහ අගමැතිතුමා අසමත්වීම මත මෙවැනි තීන්දුවක් ගැනීමක් සිදු වූයේද යන්න පිළිබඳව මාධ්‍යවේදීන් විමසා සිටීමේදී ඊට පිළිතුරු දුන් අමාත්යවරයා,
”ඒ තර්කය දැම්මොත් ජනාධිපතිතුමා ඇමතිවරුන්ට බලය පවරන්නේ ඇයි? ජනාධිපතිවරයා සතු විධායක බලය තමයි කැබිනට් ඇමතිවරුන්ට පවරලා තියෙන්නේ. කැබිනට් ඇමතිවරු හරහා එම විධායක බලය රාජ්‍ය ඇමතිවරු දක්වා පහළට දීලා තිබෙනවා. එය කළ යුතු දෙයක් මිසක් ජනාධිපතිවරයාට කරන්න බැරි නිසා කරන දෙයක් නෙවෙයි. ඒ විදිහට අර්ථකථනය කිරීම සුදුසු නැහැ. වැරදියි.”
එමෙන්ම, තමුන්ට ඇත්තේ බැසිල් රාජපක්ෂ පැමිණීම ගැන ගැටළුවක් නොව 20 වැනි ආණ්ඩුක්‍රම ව්‍යවස්ථා සංශෝධනය හරහා ද්විත්ව පුරවැසියන්ට පාර්ලිමේන්තුව නියෝජනය කිරීමට ඉඩ ලබාදීම සම්බන්ධ කාරණය පිළිබඳව බව අමාත්යවරයා පවසන ලදී.
