ප්‍රජාතන්ත්‍රවාදී අයිතියට ගරු කරමින් තායිවානයට තර්ජනාත්මක බලපෑම් එල්ල කිරීම නවත්වන්නැයි තායිවානයේ නව ජනපති විලියම් ලායි චීනයෙන් ඉල්ලා සිටිනවා.
පසුගිය සඳුදා දිනයේ අභිනවයෙන් දිවුරුම් දීමෙන් අනතුරුව , චීනය සහ තායිවානය අතර ගැටුම සංවාදයක් බවට පරිවර්තනය කර ගන්නා ලෙස ඔහු චීනය වෙත යෝජනාවක් ඉදිරිපත් කර තිබුණා.
දීර්ඝ කාලයක් පුරාවට තායිවානය එරටට අයිති දිවයිනක් බව පවසමින් චීනය විසින් එල්ල කරන බලපෑම් ඉදිරියේ කිසිවිටෙකත් පසුබට නොවන බව තායිවානයේ නව ජනාධිපතිවරයා අවධාරණය කර තිබෙනවා.
කෙසේවෙතත්, තායිවාන ජනපතිගේ මෙම ඉල්ලීමට චීනයෙන් යහපත් ප්‍රතිචාරයක් නොලැබී ඇති අතර ඔවුන් පවසා ඇත්තේ තායිවානයට ස්වාධීන රටක් බවට පත් වීම, මාරාන්තික අවසානයක් සහිත සටනක් වනු ඇති බවයි.
තායිවානයේ නව ජනපති ලෙස පත්වූ විලියම් ලායිට සහ ඔහුගේ ප්‍රජාතන්ත්‍රවාදී ප්‍රගතිශීලී පක්ෂය (DPP) , චීනය විරුද්ධවාදීන් ලෙස සලකන අතර ජනවාරි මාසයේ ඔහු ජනාධිපතිවරණයෙන් ජයග්‍රහණය කිරීමත් සමඟ තායිවානයේ සාගර හා ගුවන් කලාප අවට හමුදා ආක්‍රමණ දැඩි කර තිබුණා.
