වැලිකන්ද, මුතුගල, සෙවනපිටිය ප්රදේශයේ ඊයේ (18) අළුයම කාන්තාවක සැකකටයුතු ලෙස මියගොස් ඇති බවට වැලිකන්ද පොලිස් ස්ථානයට ලැබුණු පැමිණිල්ලක් මත විමර්ශන ආරම්භ කර තිබෙනවා.
එහිදී මරණකාරිය සිය දියණිය, බෑනා, බෑනාගේ මව සහ දියණියගේ දරුවන් සමඟ එක් නිවසක පදිංචිව සිට ඇති අතර, පසුගිය 17 වැනිදා රාත්රියේ බීමතින් පැමිණි බෑනා දියණිය සමඟ ඇති කරගත් ආරවුලක් සමතයකට පත් කිරීමට යාමේදී බෑනා විසින් මෙම මරණකාරිය පසෙකට තල්ලු කර දමා තිබෙන බවට අනාවරණය වූ බව පොලිසිය පවසනවා.
එහිදී බියට පත් වූ නිවසේ සිටි පිරිස යාබද නිවෙසක් වෙත ගොස් ඉන් අනතුරුව අළුයම පොලිස් නිලධාරීන් සමඟ නිවෙස පරීක්ෂාකිරීමේදී අදාල මරණකාරිය සාලයේ වැටී සිටිනු දැක තිබෙනවා.
මෙලෙස මියගොස් ඇත්තේ මුතුගල, සෙවනපිටිය ප්රදේශයේ පදිංචි වයස අවුරුදු 79ක් වූ කාන්තාවක්.
කෙසේ නමුත් මෙම මරණය සැකසහිත බවට පොලිසිය නිගමනය කිරීමෙන් අනතුරුව වයස අවුරුදු 43ක් වූ ඇයගේ බෑනා සැකපිට පොලිස් අත්අඩංගුවට ගෙන තිබෙනවා.
මෘතදේහය පොළොන්නරුව රෝහලේ මෘත ශරීරාගාරයේ තැම්පත් කර ඇති අතර, පශ්චාත් මරණ පරික්ෂණය එලඹෙන 22වැනි දා සිදු කිරීමට නියමිත බව පොලිසිය පවසනවා.
අත්අඩංගුවට ගත් සැකකරු අද දින පොළොන්නරුව මහේස්ත්රාත් අධිකරණය වෙත ඉදිරිපත් කිරීමට නියමිත අතර, වැලිකන්ද පොලිසිය මෙම සිදුවීම සම්බන්ධයෙන් වැඩිදුර විමර්ශන සිදුකරනු ලබනවා.