ඇෆ්ගනිස්තාන භූමිය වෙනත් කිසිදු රටක ආරක්ෂාවට තර්ජනයක් එල්ල කරන කටයුතු සදහා යොදාගැනීමට ඉඩ නොතබන බවට තලේබාන් සංවිධානය චීනයට සහතික වී තිබේ.
නව දෙනෙකුගෙන් යුත් විශේෂ තලේබාන් නියෝජිත පිරිසක් චීනයේ ටියැන්ජින් නගරයේදී විදේශ අමාත්ය වැන්ග් යී සමග පැවැත්වූ සාකච්ඡාවකදී මෙම සහතිකය ලබාදී ඇති බව විදෙස් මාධ්ය වාර්තා කරයි.
ඇෆ්ගනිස්තානයට මායිම් වී ඇති චීනයේ ෂින්ජියෑන්ග්හි ක්රියාත්මක උයිගුර් මුස්ලිම් සුලුතරයේ අයිතිවාසිකම් දිනාගැනීමේ සටනට තලේබාන් අනුග්රහය ලැබිය හැකි බවට සැක මතුව තිබේ.
මේ හේතුවෙන් චීනය තලේබාන් නායකයන් හමුවී මේ පිළිබද සාකච්ඡා කර ඇති බව විදෙස් මාධ්ය වාර්තා කරයි.
තලේබාන් සංවිධානය ඇෆ්ගනිස්තානයේ ග්රාමීය ප්රදේශ රැසක බලය තහවුරැ කරගැනීම මෙම සාකච්ඡා කඩිනම් කිරීමට හේතුවූ බවද විදෙස් මාධ්ය වාර්තාවල දැක්වේ.
සාකච්ඡාවලදී, චීන විදේශ අමාත්ය වැන්ග් යී ප්රකාශ කර ඇත්තේ තමන් ඇෆ්ගනිස්තානයේ කටයුතුවලට මැදිහත්වීමෙන් වැළකී එරට ගැටලු විසදා සාමය ඇති කිරීමට අවශ්ය සහය පමණක් ලබාදෙන බවයි.