ඇෆ්ගනිස්තානය තුළ පවතින නවීන අතහැර දැමූ අවි දකුණු ආසියාවේ ආරක්ෂාවට බරපතල බලපෑම් ඇතිකරනු ඇතැයි අයිතිවාසිකම් සහ ආරක්ෂාව සඳහා වූ ජාත්‍යන්තර සංසදයේ වාර්තාවක් (IFFRAS) අනතුරු අඟවා තිබේ.
ඇමරිකානු සහ නේටෝ හමුදා විසින් අතහැර දමා ගිය මෙම අවි ත්‍රස්තවාදයට යොදා ගැනීමට ඉඩ නොතබන බවට තලේබාන් සංවිධානය සහතික වී තිබිණ.
එහෙත් ඊට පටහැනිව, මෙම අවි ඇෆ්ගනිස්ථානයේ ආයුධ වෙළඳපොළ තුළ විකිණෙමින් ඇති බව විදෙස් වාර්තා පවසයි.
දැනටමත් මෙම අවි පාකිස්තානයට හොර රහසේ ගෙන යන බවත් ඒවා අවසානයේ ඉන්දියාවට එරෙහිව දේශසීමා සටන් සඳහා භාවිත කිරීම‍ට පවා ඉඩ ඇති බවත් අදාළ සංසදය සදහන් කරයි.
මෙම නීතිවිරෝධී අවි ජාවාරම පාලනය නොකළහොත් විශාල වන්දියක් ගෙවීමට ඇෆ්ගනිස්තානයට මෙන්ම පාකිස්තානයට ද සිදුවනු ඇති බවට එම සංසදය නිකුත් කළ වාර්තාවක දැක්වේ.
එක්සත් ජනපදය විසින් සාදන ලද ආයුධ සහ මිලිටරි උපාංග ඇෆ්ගන් ආයුධ වෙළෙන්දන් විසින් විවෘතව වෙළඳසැල්වල වෙළඳාම් කරනු ලබන බවත් මෙම ආයුධ වැඩි වශයෙන් අලෙවි කරනු ලබන්නේ ඇෆ්ගන්-පකිස්තාන දේශසීමාවේ ගෝත්‍රික ප්‍රදේශවල ආයුධ වෙළඳපොළෙහි බවත් පැවසේ.
