මෝස්තර නිරූපණය පිළිබඳ පන්තියකට සහභාගී වූ 19 හැවිරිදි තරුණියක් දූෂණයට ලක් කිරීමේ සිද්ධියක් සම්බන්ධයෙන් විලාසිතා නිර්මාණ ශිල්පියෙකු වන එම පන්තියේ ගුරුවරයා අත්අඩංගුවට ගෙන තිබෙනවා.
පොලීසිය සඳහන් කළේ , පොලිස් හදිසි ඇමතුම් අංක 119 ට ලැබුණු දුරකථන පණිවුඩයකට අනුව සිද්ධියට සම්බන්ධ සැකකරු ඊයේ (14) අත්අඩංගුවට ගත් බවයි.
මාවතගම නගරයේ පිහිටි පෞද්ගලික අධ්‍යාපන ආයතනයක පවත්වාගෙන යන මෝස්තර නිරූපණ ශිල්පය විෂයය ඉගෙන ගැනීමට අදාළ තරුණිය ඊයේ (13) පැමිණි අවස්ථාවේදී මෙම සිදුවීම හට ගෙන තිබෙනවා.
එහිදී අදාළ පන්තිය අවසන් වනවිට පැවැති අධික වර්ෂාව හේතුවෙන් එම තරුණිය ඇතුළු තවත් තරුණියන් තිදෙනෙකු කෙටි වෙලාවක් එහි නතරවී සිට තිබුණා.
අනතුරුව මෝස්තර නිරූපණ ශිල්පය උගන්වනු ලබන සැකකාර ගුරුවරයා අදාළ තරුණියන් සමග මත්පැන් පානය කර තිබෙන බවට පොලීසිය සිදුකළ විමර්ශනවලදී අනාවරණය වී තිබෙනවා.
පසුව අනෙක් තරුණියන් තිදෙනා පිටව ගොස් ඇති අතර අදාළ තරුණිය අධික ලෙස මත්වීමෙන් පසු එහි නතරවී ඇති අතර, පොලීසිය සඳහන් කළේ එහිදී අදාළ ගුරුවරයා මෙම අපරාධය සිදුකර ඇති බවයි.
ඒ අනුව, සිද්ධිය සම්බන්ධයෙන් සැකපිට මෝස්තර නිරූපණ ශිල්පය උගන්වනු ලබන ගුරුවරයාව මාවතගම පොලීසිය විසින් අත්අඩංගුවට ගෙන තිබෙනවා.
මෙසේ අත්අඩංගුවට ගෙන ඇත්තේ මාවතගම අරම්පොලවත්තේ පදිංචි 40 හැවිරිදි විවාහක පුද්ගලයෙක්.
අතවරයට ලක්වූ තරුණිය වෛද්‍ය පරීක්ෂණයක් සඳහා කුරුණෑගල ශික්ෂණ රෝහලට ඇතුළත් කර තිබෙනවා.
පොලීසිය විසින් සිද්ධිය පිළිබඳ වැඩිදුර විමර්ශන සිදු කරනවා.
