ආසියනු ක්‍රීඩා උළෙලේ මීටර් 800 ඉසව්වෙන් රන් පදක්කම හිමි කර ගත් තරුෂි කරුණාරත්න හට ඇමරිකාවේ විශ්ව විද්‍යාලයක ශිෂ්‍යත්වයක් හිමිව ඇති බව ඇයගේ පුහුණුකරුවන සුසන්ත ප්‍රනාන්දු පවසනවා.
ප්‍රනාන්දු මහතා සඳහන් කළේ ආසියානු මලල ක්‍රීඩා ශුරතාවලියේ දී ඇය පෙන්වූ දක්ෂතා සැලකිල්ලට ගෙන ඇමෙරිකාවේ විශ්ව විද්‍යාලයක් ඇයට මෙලෙස ශිෂ්‍යත්වයක් පිරිනමා ඇති බවයි.
ඒ අනුව ඇය ලබන වසරේදී එම ශිෂ්‍යත්වය සඳහා ඇමරිකාව බලා යනු ඇති බව ප්‍රනාන්දු මහතා බී.බී.සී සිංහල සේවය වෙත පවසා තිබුණා.
තරුෂි ක්‍රීඩාවට මෙන්ම අධ්‍යාපනයට දස්කම් දක්වන අතර ඇය වාණිජ අංශයෙන් මෙවර උසස් පෙළ විභාගය සඳහා පෙනී සිටින බව ප්‍රනන්දු මහතා තවදුරටත් සඳහන් කළා.
“මගේ නම් බලාපොරොත්තුව ඒ ශිෂ්‍යත්වය කරා යැවීමට.”
“මොකද එයාලා ගොඩක් ආර්ථික අපහසුතා මැද තමයි මේ ගමන ආවේ. ඇයගේ දෙමව්පියෝ ලොකු කැපවීමක් කරනවා. ඉතින් තරුෂි ජයගන්නවා වගේම ඇයගේ දෙමව්පියන් සහ පවුලේ අයත් ජය ගන්න ඕන. අධ්‍යාපන කටයුතු කරගෙන, ක්‍රීඩාව නතර කරන දවසට ආර්ථිකයත් ශක්තිමත් කරගෙන, පවුලේ අයවත් හොඳින් තියන්න පුළුවන් තැනකට ඇය එන්න ඕන කියලා.”
“ඒ නිසා බලාපොරොත්තු වනවා ලබන වසරේදී ඇයට ඒ ගමන යන්න යෑමට අවශ්‍ය සුදානම ලබා දෙන්න. “
“මොකද අපේ කියලා ඇයව රටේම තියා ගන්න මගේ කිසිම බලාපොරොත්තුවක් නැහැ.” තරුෂි කරුණාරත්නගේ පුහුණුකරු වන සුසන්ත ප්‍රනාන්දු සඳහන් කළේය.
