ශ්‍රී ලංකා පොලීසිය විසින් සමාජ මාධ්‍ය ඔස්සේ “ව්‍යාජ ප්‍රවෘත්ති, ඡායාරූප, අසමගිය ඇති කරන වීඩියෝ පට, වෛරය සහ කොවිඩ් -19 වැඩසටහනට බාධා කිරීම්” පිළිබඳ පුවත් පළකරන්නන් අත්අඩංගුවට ගැනීම සම්බන්ධයෙන් නිකුත් කරන ලද මාධ්‍ය නිවේදනය පිළිබඳ ශ්‍රී ලංකා නීතිඥ සංගමය සිය විරෝධය සහ කණසල්ල පළ කිරීමට කටයුතු කර තිබේ.
වෛරී කථනය හා ප්‍රචණ්ඩත්වයට පොළඹවා ගැනීම සම්බන්ධ නීති ක්‍රියාත්මක කිරීමට කිසිදු විරුද්ධත්වයක් නොමැති නමුත් බලධාරීන් එවැනි නීති භාවිතා නොකිරීමට වගබලා ගැනීම වැදගත් බව එම සංගමයේ විධායක කමිටුව මෙහිදී පෙන්වා දී ඇත.
අපරාධ පරීක්ෂණ දෙපාර්තමේන්තුව සහ ශ්‍රී ලංකා පොලිසියේ පරිගණක අපරාධ අංශය විසින් නීති උල්ලංඝනය කරන්නන් නිරීක්ෂණය කරමින් පරීක්ෂණ පවත්වන බවට අනතුරු ඇඟවීමක් එම චක්‍රලේඛය මඟින් සිදු කෙරිණි.චක්‍රලේඛයේ සඳහන් නීතිවල විධිවිධාන, පොලිස් නිලධාරීන් විසින් අනිසි ලෙස භාවිතා කළ හැකි බවට නීතිඥ සංගමය දැඩි ලෙස කනස්සල්ලට පත්ව සිටී.
ව්‍යාජ ප්‍රවෘත්ති පතුරුවා හැරීමෙන් වළකින ලෙසත්, ඒ සඳහා ආධාර කිරීම හෝ අනුබල දීමෙන් වළකින ලෙසත් මෙම චක්‍රලේඛය මහජනතාවට අනතුරු අඟවයි.
කොවිඩ්-19 වසංගතයේ ප්‍රතිඵලයක් ලෙස රට සංචාරක සීමාවන් යටතේ පවතින මොහොතේ ජනතාවගේ අදහස් ප්‍රකාශ කිරීමේ නිදහස සහ විසම්මුතියට හා එකඟ නොවීමට ඇති අයිතිය ආරක්ෂා කිරීම අත්‍යවශ්‍ය බව එම සංගමය නිවේදනය ඔස්සේ පෙන්වා දී තිබේ.
