කොළඹ සිට නුවර බලා යමින් සිටි ගුවන් විදුලි සභාපති ජයම්පති හීන්කෙන්ද මහතා කඩුගන්නාව පොලිස් මාර්ග බාධකයේ පැය දෙකක කාලයක් රඳවාගෙන සිටීම සම්බන්ධයෙන් මේ වන විට පොලිස් පරික්ෂණයක් ආරම්භ කර ඇතැයි වාර්තා වේ.
පවතින සංචරණ සීමා වාතාවරණය තුළ මාධ්‍ය ආයතන අත්‍යාවශ්‍ය සේවාවක් ලෙස ප්‍රකාශයට පත් කර තිබුණ ද තමන් ගුවන් විදුලි සංස්ථා සභාපතිවරයා බව පැහැදිලිව පෙන්වාදී තිබිය දීත් අදාළ මාර්ග බාධකයේ සේවයේ නියුතු පොලිස් පරීක්ෂකවරයා මහනුවරට ඇතුළු වීමට අවසර ලබා නොදුන් බව ගුවන්විදුලි සභාපතිවරයා මේ පිළිබඳ පැමිණිල්ලක් ඉදිරිපත් කරමින් ප්‍රකාශ කර තිබේ.
ඔහු මහනුවර වෙත ගමන් කළේ එදින පස්වරුවේ පල්ලෙකැලේ පොලිසිය සමඟ සම්බන්ධ වී පැවැත්වීමට නියමිතව තිබූ සජීවි විකාශයක් හා සම්බන්ධවීමට බවත් ප්‍රමාදය හේතුවෙන් එම වැඩසටහනට සහභාගීවීමට නොහැකි වූ බවත් හීන්කෙන්ද මහතා පවසා තිබේ.
මේ පිළිබඳ විධිමත් පරීක්ෂණයක් පවත්වන ලෙස ඒ මහතා මධ්‍යම පළාත් ජ්‍යෙෂ්ඨ නියෝජ්‍ය පොලිස්පතිවරයාගෙන් ඉල්ලීමක් ද සිදු කර තිබේ.
