පාර්ලිමේන්තු මන්‍ත්‍රී එම්.ඒ සුමන්තිරන් මහතා උතුරු පළාතේ වැඩබිමක චීන කම්කරුවකුගේ ඡායාරූපයක් සමඟ ඔහුගේ ට්විටර් ගිණුමෙහි පළ කළ පණිවුඩයක් සම්බන්ධයෙන් චීන තානාපති කාර්යාලය ද ට්වීට් පණිවුඩයක් නිකුත් කිරීමට කටයුතු කර තිබෙනවා.
“වනක්කම් පාර්ලිමේන්තු මන්ත්‍රීතුමනි,
2020 චීනයේ ඒක පුද්ගල දළ දේශීය නිෂ්පාදිත අගය ඩොලර් 10,484 ක් වූ අතර විදේශීය ශ්‍රමිකයින්ට එවැනි දෙගුණයක් හෝ තුන් ගුණයක වැටුපක් ලැබේ. චීන සමාගම් සෑම විටම වැඩිපුරම දේශීය සේවකයින් සේවයේ යොදවයි. එසේ නොමැතිනම් ලාභයක් නොමැත.
මේ පිළිබඳව ඔබ වෙනත් රටවල් ගැන ද කරදර විය යුතුය.”
චීන තානාපති කාර්යාලය මෙම පණිවුඩය නිකුත් කර තිබුණේ සුමන්තිරන් මන්ත්‍රීවරයා උතුරු පළාතේ වැඩබිමක සේවය කරන චීන කම්කරුවකුගේ ඡායාරූපයක් පළ කර නැවත එම ඡායාරූපය සහ පණිවුඩය ඉවත් කර ගැනීමත් සමඟයි.
මීට පෙර ඔහු පළ කළ ඡායාරූපය චීන ජාතිකයකුගේ නොවන බවත් ඉදිරියේ දී උතුරු පළාතේ වැඩකරන චීන ජාතිකයන්ගේ ඡායාරූප පළ කිරීමට කටයුතු කරන බවත් සුමන්තිරන් මහතා ප්‍රකාශ කරන ලදී.
ඒ අනුව චීන තානාපති කාර්යාලය ප්‍රකාශ කර ඇත්තේ ඒ පිළිබඳ පුදුමයට පත් නොවිය යුතු බවත් චීන සමාගම් සෑමවිටම වැඩිපුර සේවයේ යොදවන්නේ දේශීය කම්කරුවන් පමණක් බවත්ය.
