කොළඹ සැහැල්ලු දුම්රිය මාර්ග ව්‍යාපෘතිය අහෝසි කිරීම දේශපාලනික අරමුණු පදනම් කරගත් වැරැදි තීන්දුවක් යැයි කොළඹ විශ්ව විද්‍යාලයේ ආර්ථික විද්‍යා අධ්‍යයනාංශයේ ආචාර්ය ප්‍රියංග දුනුසිංහ මහතා ‘නිව්ස් 19’ ට පැවැසීය.
මෙම ව්‍යාපෘතිය හැඳින්විය හැක්කේ ඊළඟ සියවස සඳහා රට සූදානම් කරන නවීකාරක ව්‍යාපෘතියක් හැටියට යැයි ද එය අහෝසි කිරීමේ ආර්ථික මෙන්ම දේශපාලනික ප්‍රතිවිපාකවලට ලංකාව ගොදුරු වනු ඇතැයි ද ආචාර්ය දුනුසිංහ මහතා කීය.
පැවැති ආණ්ඩුව සමයේ ආරම්භ කළ මෙම ව්‍යාපෘතිය අහෝසි කිරීමට ආණ්ඩුව දක්වන තර්ක පදනම් විරහිත යැයි චෝදනා කළ හෙතෙම දේශපාලන පදනමින් විදේශ ව්‍යාපෘති බැහැර කිරීම ප්‍රතිපත්තිය කරගතහොත් ආධාර දෙන රටවල් ඉදිරියේදී ලංකාව බැහැර කරනු ඇතැයි අනතුරු ඇඟවීය.
ඩොලර් බිලියන 1.5 ක ජපාන සහනදායි ණය ක්‍රමයකින් නිමකිරීමට සැලසුම් කල කොළඹ සැහැල්ලු දුම්රිය සංක්‍රමණ (LRT) ව්‍යාපෘතිය අහෝසි කිරීමට ආණ්ඩුව තීරණය කළ අතර ඊට වන්දි වශයෙන් මේ වනවිට ලංකාව රුපියල් කෝටි 627ක් ජපාන සමාගමට ගෙවීමට සූදානම් බව වාර්තා වේ.
