ශ්‍රී ලංකා ක්‍රිකට් කණ්ඩායමේ ක්‍රීඩකයින් සහ ශ්‍රී ලංකා ක්‍රිකට් ආයතනය අතර ක්‍රීඩක කොන්ත්‍රාත් ගිවිසුම සම්බන්ධයෙන් තිබුණු අර්බුදය නිමා වී ඇති බව ශ්‍රී ලංකා ක්‍රිකට් ආරංචි මාර්ග පවසනවා.
මීට හේතු වී ඇත්තේ එංගලන්ත සංචාරය නිම කර පැමිණි සියලු ක්‍රීඩකයින් ඉදිරි වසර සඳහා වන කොන්ත්‍රාත් ගිවිසුමට අත්සන් තැබීමයි.
තරඟ සංචාරය නිමවා ඊයේ (06) සවස දිවයිනට පැමිණි ක්‍රීඩකයින් හට ගිවිසුමට අත්සන් තැබීම සඳහා ක්‍රිකට් ආයතනය මගින් අද උදෑසන 8 දක්වා කාලය ලබාදී තිබුණා.
එම කාලය තුල ගිවිසුම් ගත නොවන ක්‍රීඩකයින් ඉදිරි ඉන්දීය තරඟාවලියට ඇතුලත් කර නොගන්නා බවටද ශ්‍රී ලංකා ක්‍රිකට් ආයතනය විසින් අනතුරු අඟවනු ලැබුවා.
කෙසේ වෙතත් දිවයිනට පැමිණි සියලු ක්‍රීඩකයින් ලබා දී තිබූ කාලය ඉකුත් වීමට පෙර ඉදිරි වසර සඳහා වන ක්‍රීඩක ගිවිසුමට අත්සන් තබා තිබෙනවා.
මීට පෙර ශ්‍රී ලංකා කණ්ඩායමේ ක්‍රීඩකයින් ඔවුන් වර්ග කිරීමේදී අනුගමනය කළ ක්‍රමවේදය සම්බන්ධයෙන් නිසි පාරදෘශ්‍යභාවයක් නොතිබූ බව පවසමින් ගිවිසුමට අත්සන් තැබීම ප්‍රතික්ෂේප කළා.
ඒ අනුව කණ්ඩායම එංගලන්ත සංචාරය සඳහා පිටත්ව ගියේ තරගාවලි ගිවිසුම (Tour Contract) පමණක් අත්සන් කරමින්.
